ٹانک: دہشت گردوں نے پولیس اہلکار کو اغوا کے بعد ہلاک کر دیا

ٹانک (نمائندہ ڈیلی اردو)  پاکستان کے شورش زدہ صوبے خیبر پختونخوا کے ضلع ٹانک میں کالعدم تحریک طالبان پاکستان (ٹی ٹی پی) کے دہشت گردوں نے ایک پولیس اہلکار کو اغوا کے بعد فائرنگ کرکے ہلاک کر دیا۔ واقعے کے بعد پولیس اور سیکیورٹی فورسز نے علاقے میں سرچ آپریشن شروع کر دیا ہے۔

پولیس کے مطابق کانسٹیبل قیمت خان گل امام پولیس چوکی پر تعینات تھے اور ڈیوٹی ختم ہونے کے بعد موٹر سائیکل پر گھر جا رہے تھے کہ ٹی ٹی پی کے مسلح کارندوں نے انہیں اسلحے کی نوک پر اغوا کر لیا۔ بعد ازاں دہشت گردوں نے انہیں فائرنگ کرکے ہلاک کر دیا۔

واقعے کی اطلاع ملتے ہی ریسکیو 1122 نے لاش کو ڈی ایچ کیو ہسپتال منتقل کیا۔ پولیس نے واقعہ کی ایف آئی آر درج کر کے علاقے کا محاصرہ کر لیا اور سیکیورٹی فورسز کے ہمراہ ٹی ٹی پی کے خلاف سرچ آپریشن شروع کر دیا۔

گزشتہ شب ہلاک پولیس اہلکار کی نمازِ جنازہ پولیس لائن ٹانک میں سرکاری اعزاز کے ساتھ ادا کی گئی۔ جنازے میں ڈسٹرکٹ پولیس آفیسر شبیر حسین شاہ، سیکیورٹی فورسز کے افسران، پولیس اہلکاروں اور شہریوں نے بڑی تعداد میں شرکت کی۔ اس موقع پر میت پر پھولوں کی چادر چڑھائی گئی اور پولیس کے چاق و چوبند دستے نے سلامی پیش کی۔

ڈی پی او شبیر حسین شاہ نے کہا کہ قیمت خان کی قربانی رائیگاں نہیں جائے گی اور ٹی ٹی پی سمیت امن دشمن عناصر کے خلاف کارروائیاں سخت سے سخت تر کی جائیں گی۔ ان کے مطابق عوام کے جان و مال کے تحفظ کے لیے تمام وسائل بروئے کار لائے جائیں گے۔