ٹانک میں دہشت گردوں کی فائرنگ، ایف سی اہلکار سمیت 2 اہلکار ہلاک

ٹانک (ڈیلی اردو رپورٹ) پاکستان کے شورش زدہ صوبہ خیبر پختونخوا کے ضلع ٹانک میں دہشت گردوں کی فائرنگ کے دو مختلف واقعات میں محکمہ وائلڈ لائف اور فیڈرل کانسٹیبلری کے دو اہلکار ہلاک ہو گئے۔

پہلا واقعہ گاؤں وانڈہ ذلو میں پیش آیا جہاں نامعلوم مسلح افراد نے محکمہ وائلڈ لائف کے اہلکار دل جان عرف پتو خان کو فائرنگ کرکے ہلاک کر دیا۔

دوسرا واقعہ تھانہ صدر کی حدود علی خیل روڈ پر پیش آیا جہاں نامعلوم افراد کی فائرنگ سے فیڈرل کانسٹیبلری کے اہلکار مجیب خان ہلاک ہو گئے۔ 

پولیس ذرائع کے مطابق مجیب خان چھٹی پر اپنے گھر آئے ہوئے تھے اور اپنے گاؤں علی خیل سے کسی کام کے سلسلے میں ٹانک شہر جا رہے تھے کہ راستے میں مسلح افراد نے ان پر فائرنگ کر دی۔

ریسکیو 1122 نے مجیب خان کی لاش ڈی ایچ کیو ہسپتال منتقل کر دی جبکہ پولیس نے مقدمہ درج کرکے علاقے کو گھیرے میں لے لیا اور سرچ آپریشن شروع کر دیا ہے۔