ٹانک میں سی ٹی ڈی کی کارروائی، کالعدم ٹی ٹی پی کے 2 دہشت گرد ہلاک

پشاور (نمائندہ ڈیلی اردو) صوبہ خیبر پختونخوا کے ضلع ٹانک میں کاونٹر ٹیریرزم ڈیپارٹمنٹ (سی ٹی ڈی) کی کارروائی کے دوران دو دہشت گرد ہلاک ہوگئے۔ جبکہ آپریشن کے دوران ایک پولیس اہلکار بھی ہلاک ہوا۔

تفصیلات کے مطابق ایس ایس پی آپریشن سی ٹی ڈی نجم الحسنین لیاقت نے پشاور میں پریس کانفرنس کرتے ہوئے بتایا کہ دونوں دہشت گرد آپریشن کے دوران ہلاک کیے گئے۔ جبکہ ہلاک ہونے والے دہشت گرد پولیس اور سی ٹی ڈی کو 23 مقدمات میں مطلوب تھے۔ انہوں نے بتایا کہ دو دہشت گرد فرار ہوگئے ہیں۔

تاہم آپریشن کے دوران دہشت گردوں کی فائرنگ سے ایک اہلکار زاہد بھی ہلاک ہوگیا۔

انہوں نے کہا کہ دہشت گردوں کے دو فرار ساتھیوں کے خلاف علاقے میں سرچ آپریشن جاری ہے، دہشت گردوں کا تعلق کالعدم تنظیم تحریک طالبان پاکستان بیٹنی پراکے گروپ سے تھا۔

ایس ایس پی نجم الحسن کا کہنا تھا کہ دہشت گرد ضلع ٹانک اور ڈیرہ اسماعیل خان میں پولیس پر حملے اور اہلکاروں سے اسلحہ چھیننے میں ملوث تھے۔

انہوں نے کہا کہ دہشت گرد ٹانک اور ڈیرہ اسماعیل خان میں پولیس پر حملے اور اسلحہ چھیننے میں ملوث تھے۔

ان کا کہنا تھا کہ ڈی آئی خان میں تھانہ چوہدوان پر حملے میں ملوث دہشت گردوں تک پہنچ چکے ہیں، تھانے پر حملے میں ملوث دہشت گردوں میں سے 6 کا تعلق درابن اور 4 کا دیگر علاقوں سے تھا۔