پاراچنار: پاڑہ چمکنی اور بالش خیل قبائل میں تصادم، 3 روز میں 9 افراد ہلاک، 40 زخمی

پاراچنار (محمد صادق) قبائلی ضلع کرم کے علاقہ بالش خیل میں زمین کے تنازعہ پر پاڑہ چمکنی اور بالش خیل قبائل کے مابین جھڑپوں کا سلسلہ تیسرے روز بھی جاری ہے جھڑپوں میں فریقین کے 9 افراد ہلاک اور 40 سے زائد زخمی ہوگئے ہیں۔

تفصیلات کے مطابق ضلع لوئر کرم میں زمین کے تنازع پر شروع ہونے والا تصادم، شیعہ سنی فسادات میں تبدیل ہو گیا ہے اور دونوں گروپوں کی جانب سے ایک دوسرے کے خلاف بھاری ہتھیاروں کا استعمال کیا جا رہا ہے، بالیش خیل قبیلے کا تعلق اہل تشیع سے ہے جبکہ پاڑہ چمکنی اہل سنت سے تعلق رکھتے ہیں۔

ہسپتال اور پولیس ذرائع کے مطابق ضلع کرم میں واقع لوئر کرم کے علاقہ بالش خیل کے شاملاتی اراضی میں گذشتہ روز پاڑہ چمکنی قبائل نے بالش خیل قبائل پر فائرنگ بعد فریقین کے مابین خونریز جھڑپیں جاری ہیں، اب تک ان جھڑپوں میں فریقین کے نو افراد ہلاک اور چالیس سے زائد زخمی ہوگئے ہیں۔

پارلیمنٹیرینز قبائیلی عمائدین ضلعی انتظامیہ اور سیکیورٹی فورسز کی جانب سے جھڑپیں رکھوانے کے لئے کوششیں جاری ہیں۔ جھڑپوں میں فریقین کی جانب سے بھاری اور خود کار ہتھیاروں کا استعمال کیا جارہا ہے۔ زخمیوں کی صدہ اور پاراچنار ہسپتال میں علاج کی جارہی ہے۔

ڈی پی ضلع کرم محمد قریش اور ڈپٹی کمشنر شاہ فہد نے میڈیا کو بتایا کہ قبائیلی عمائدین اور قانون نافذ کرنے والے اداروں کی تعاون سے فریقین کے مابین جھڑپیں رکھوانے کے لئے مذاکرات کا سلسلہ جاری ہے۔

دوسری جانب مختلف تنظیموں اور طلبہ کی جانب سے جائیداد کے تنازعے پر پیدا ہونے والی صورتحال کے خلاف دھرنا دے رہے ہیں اور اس قسم صورتحال سے مستقبل میں بچنے اور جھڑپیں فوری طور رکھوانے کے لئے اقدامات اٹھانے کا مطالبہ کیا گیا۔

راہنماوں نے کہا کہ اگر انتظامیہ تنازعات کے حل کے لئے موثر اقدامات اٹھاتی اور بر وقت مسائل حل کئے جاتے تو نوبت یہاں تک نہ پہنچتی۔