پاکستان دہشت گردی سے متاثرہ پانچواں بڑا ملک

واشنگٹن (ڈیلی اردو/نیوز ایجنسی) پاکستان میں امن و امان کی صورت حال ہر گزرتے سال کے ساتھ کچھ بہتر ہونے لگی۔

گلوبل ٹیررزازم انڈیکس کی رپورٹ کے مطابق دہشتگردی سے جانی نقصان والے ممالک میں پاکستان کا نمبر پانچواں ہے۔

آسٹریلوی تھنک ٹینک کی رپورٹ کے مطابق پاکستان میں سال 2018 میں دہشت گردی سے جانی نقصان میں 2013 کے مقابلے میں 83 فیصد کمی آچکی ہے۔

گلوبل ٹیررازم انڈیکس میں دہشت گردی سے متاثرہ ملکوں میں افغانستان پہلے نمبر پر پہنچ گیا ہے، جہاں 2018 میں دہشت گردی کی ایک ہزار 443 واقعات میں 7 ہزار 379 افراد جان سے گئے۔ عراق جو 2004 سے دہشت گردی سے متاثرہ ملکوں میں پہلے نمبر پر تھا اب دوسرے نمبر پر آ چکا ہے۔

عراق میں گزشتہ سال ایک ہزار 131 واقعات میں 1054ایک ہزار 54 زندگیوں کے چراغ بجھ گئے۔نائجیریا تیسرے نمبر پر ہے جہاں 562 واقعات میں 2 ہزار 40 شہادتیں ہوئیں۔ شام چوتھے نمبر پر رہا جہاں دہشت گردی کے 131 واقعات رونما ہوئے جن میں 662 افراد کو موت کے گھاٹ اتار دیا گیا۔

پاکستان اس فہرست میں پانچویں نمبر پر ہے جہاں دہشت گردی کے 366 واقعات میں 537 افراد شہید اور ایک ہزار سے زائد زخمی ہوئے۔ صومالیہ میں 286 واقعات میں 646 جانوں کا ضیاع ہوا۔

دہشت گردی سے متاثرہ ممالک کی عالمی فہرست میں بھارت ساتویں، یمن آٹھویں، فلپائن نویں اور کانگو دسویں نمبر پر رہا۔