پاکستان کا ہیرو: اعتراز حسن، جس نے اپنی جان دے کر سیکڑوں کی جانیں بچائیں

واشنگٹن (ش ح ط) پاکستان کے شورش زدہ صوبہ خیبر پختونخوا کے ضلع ہنگو میں دہشت گردی کے خلاف بہادری کے ساتھ مقابلہ کرنے والے طالبعلم اعتراز حسن بنگش کی آج بارہویں برسی ہے۔

ہنگو میں ان کے گھر پر برسی کی تقریب کا اہتمام کیا گیا۔ 

یاد رہے کہ 6 جنوری 2014ء کو گورنمنٹ ہائی سکول ابراہیم زئی کے نویں جماعت کے طالبعلم اعتراز حسن نے اسکول کے اندر داخل ہونے والے ایک مشکوک شخص کو قابو پانے کی کوشش کی۔ خودکش حملہ آور نے سکول کے مرکزی گیٹ پر دھماکہ کر دیا، لیکن اعتراز حسن نے اپنی جان قربان کر کے تقریباً دو ہزار طالبعلموں کی جانیں بچائیں۔

اعتراز حسن کی بہادری کو سراہتے ہوئے حکومت پاکستان نے انہیں ستارہ شجاعت سے نوازا۔ ان کے اعزاز میں کئی اعلانات بھی کیے گئے، اور ان کی یاد میں ’سیلوٹ‘ کے نام سے ایک پاکستانی فلم بھی بنائی گئی، تاہم زیادہ تر وعدے آج تک پورے نہیں ہو سکے۔

اس موقع پر اعتراز حسن کے والد، مجاہد علی بنگش، نے کہا کہ اعتراز حسن کی بارہویں برسی خاموشی سے گزر گئی، نہ کوئی بڑی تقریب ہوئی اور نہ اہل خانہ سے کوئی رابطہ کیا گیا۔ انہوں نے فخر کا اظہار کرتے ہوئے کہا، “میرے لخت جگر نے دشمن کو للکارا اور اپنی جان دے کر معصوم بچوں کی جانیں بچائیں۔”

اعتراز حسن کے بھائی، مجتبیٰ علی بنگش، نے بتایا کہ خاندان مسلسل دھمکیوں کے باعث کام کاج سے قاصر ہے، مالی مشکلات کا سامنا ہے، اور حکومت کے وعدے بھی محض الفاظ تک محدود رہ گئے۔ انہوں نے کہا، “طلبہ کی جانیں بچانے والے اعتراز حسن کی قربانی کو بھلایا نہیں جا سکتا۔ انہوں نے اسکول پر خودکش حملے کو ناکام بنا کر پوری دنیا میں بہادری کی ایک نئی مثال قائم کی۔”

مزید برآں، مجتبیٰ علی بنگش کو پاکستانی طالبان کی جانب سے مسلسل دھمکیوں کا سامنا ہے، جس کے باعث وہ اپنا ملک چھوڑ کر ایک ہمسایہ ملک میں زندگی گزارنے پر مجبور ہیں۔

یاد رہے کہ ضلع ہنگو ماضی میں فرقہ وارانہ تشدد کے حوالے سے انتہائی حساس رہا ہے، مگر گذشتہ چند سالوں میں علاقے میں امن و امان کی صورت حال میں کچھ حد تک بہتری آئی ہے۔ 2006ء میں فرقہ وارانہ فسادات کے دوران اعتراز حسن کے گھر کو ایک میزائل سے نشانہ بنایا گیا تھا، تاہم کوئی جانی نقصان نہیں ہوا۔