پاکستان، انڈیا، اٹلی اور پولینڈ نے شہریوں کیلئے ایران چھوڑنے کی ہنگامی ہدایت

واشنگٹن (ڈیلی اردو/روئٹرز) ایران میں بدامنی اور سکیورٹی کی خراب صورتحال کے سبب کئی ممالک نے اپنے شہریوں کو فوری طور پر ایران چھوڑنے کی ہدایات جاری کر دی ہیں۔

اٹلی کی وزارتِ خارجہ کے مطابق ایران میں تقریباً 600 اطالوی شہری موجود ہیں، جن میں اکثریت تہران میں مقیم ہے۔ اسی طرح پولینڈ نے بھی اپنے شہریوں کو سوشل میڈیا پر ہدایت کی ہے کہ وہ فوراً ایران چھوڑ دیں۔ انڈین سفارتخانے نے بھی شہریوں کو دستیاب ذرائع نقل و حمل کے ذریعے ایران چھوڑنے کا مشورہ دیا ہے۔

ادھر پاکستان کے شہریوں کی وطن واپسی کا سلسلہ جاری ہے۔ بلوچستان کے سرحدی ضلع گوادر کے راستے گزشتہ تین سے چار روز میں ایران سے 380 سے زائد پاکستانی شہری واپس آئے، جن میں تقریباً 150 طلبہ شامل تھے۔ حکام کے مطابق واپسی کے بعد شہریوں کو بحفاظت ان کے آبائی علاقوں تک پہنچایا جا رہا ہے۔

ایران میں حالیہ احتجاج کی سب سے بڑی لہر کے دوران، بدھ کے روز درجنوں ایرانی باشندے سرحد عبور کر کے ترکی میں داخل ہوئے۔ ایران سے ترکی جانے والے شہری ضروری سامان ساتھ لے کر سرحدی علاقوں میں پہنچے، اور کئی نے میڈیا سے بات کرتے ہوئے وطن واپسی پر خوف کا اظہار کیا۔

امریکہ نے اپنے شہریوں کو ایران چھوڑنے کی ہدایت دی ہے اور مشورہ دیا ہے کہ وہ زمینی راستے سے ترکی یا آرمینیا روانہ ہوں۔ اس ہدایت کو امریکی ورچوئل سفارتخانے نے منگل کو تہران کے لیے جاری کیا تھا۔

ایران کے ایک سینئر عہدیدار نے بدھ کو روئٹرز کو بتایا کہ تہران نے پڑوسی ممالک کو امریکی افواج کی ایران میں نئی میزبانی کے خلاف انتباہ کیا ہے اور کہا ہے کہ اگر واشنگٹن نے ایران میں احتجاجی مظاہروں میں مداخلت کی دھمکیوں کو عملی جامہ پہنایا، تو ایران خطے میں امریکی اڈوں کو نشانہ بنا سکتا ہے۔

ترکی کے وزیر خارجہ ہاکان فیدان نے اپنے ایرانی ہم منصب عباس عراقچی کے ساتھ ٹیلی فون پر گفتگو میں خطے میں جاری کشیدگی کو مذاکرات کے ذریعے حل کرنے پر زور دیا۔