پاکستانی فوج ملک سے دہشت گردی کے خاتمے کیلئے پرعزم ہے، آرمی چیف قمر باجوہ

راولپنڈی (ڈیلی اردو) آرمی چیف جنرل قمر جاوید باجوہ نے کہا ہے کہ پاکستانی فوج ملک سے دہشتگردی کے خاتمے کیلئے پرعزم ہے۔

پاکستانی فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے پشاور کور ہیڈکوارٹر کا دورہ کیا جہاں پر انہیں پاک افغان بارڈر سے متعلق، سکیورٹی صورتحال، ضم ہونے والے اضلاع میں ترقیاتی کاموں کے بارے میں بریفنگ دی گئی۔

اس موقع پر جنرل قمر جاوید باجوہ نے پاک آرمی کے سپاہیوں، قبائلی عمائدین، ایف سی، لیوی، خاصہ دار اور پولیس اہلکاروں کو خراج تحسین پیش کیا۔

آئی ایس پی آر کے مطابق آرمی چیف جنرل قمر جاوید باجوہ نے کہا کہ ملک سے دہشتگردی کے خاتمے کے لئے پاک فوج پرعزم ہے ، شہدا کی قربانیاں رائیگاں نہیں جائیں گی۔

آئی ایس پی آر کے مطابق جنرل قمر جاوید باجوہ نے مزید کہا کہ قبائلی اضلاع میں سماجی و اقتصادی ترقیاتی منصوبوں کے لیے سازگار ماحول کی فراہمی میں سکیورٹی فورسز کا کردار قابل قدر ہے، سماجی و اقتصادی منصوبے علاقے کے پائیدار استحکام اور ترقی کے لیے ناگزیر ہیں۔