پشاور میں 100 روپے کے تنازع پر دو افراد قتل، 5 زخمی

پشاور (ڈیلی اردو) پشاور کے علاقے قاضی کلے میں دوہرا قتل کی ابتدائی تحقیقات مکمل کرلی گئی جس میں یہ بات سامنے آئی ہے کہ 100 روپے کا تنازعہ 2 افراد قتل جبکہ خاتون سمیت 5 زخمی راہگیر ہسپتال میں زیر علاج ہیں جن میں دو کی حالت تشویشناک بتائی جاتی ہے۔

اس ضمن میں رابطہ کرنے پر ایس ایچ او تھانہ فقیر آباد جاوید اختر نے بتایا کہ گزشتہ روز افطاری سے قبل طاہر ولد عبدالرحمان کا اپنے ہمسایہ شیر فروش معاذ کیساتھ تکرار ہوئی تاہم وقتی طور پر معاملہ رفع دفع ہوگیا اور پھر افطاری کے بعد طاہر اپنے ساتھیوں نجیب اللہ اور دیگر ساتھیوں کے ہمراہ آیا تو باتوں باتوں میں دونوں فریقین طیش میں آگئے اور ایک دوسرے پر فائرنگ کردی جس کے نتیجے میں نجیب اللہ، طاہر موقع پر جاں بحق جبکہ خاتون فرزانہ، سلیم، افضل، حمزہ اور عزیز جو راہگیر تھے شدید زخمی ہوگئے۔

اطلاع ملتے ہی پولیس کی بھاری نفری موقع پرپہنچ گئی اور نعشیں قبضے میں لیکر مردہ خانہ منتقل کردیں۔

پولیس کے مطابق ابتدائی تفتیش میں یہ بات سامنے آئی ہے کہ مقتول اور قاتل کے مابین 100 روپے کا تنازعہ تھا جو خون خرابے میں تبدیل ہوا یوں 100 کا تنازعہ دو جانیں نگل گیا پولیس کے مطابق مزید تفتیش جاری ہے۔