پشاور میں امریکی قونصلیٹ بند، افغانستان جنگوں کا اہم سفارتی مرکز ختم

واشنگٹن (نمائندہ ڈیلی اردو) واشنگٹن میں امریکی محکمہ خارجہ نے سکیورٹی خدشات کے باعث پاکستان کے صوبے خیبر پختونخوا کے دارالحکومت پشاور میں امریکی قونصلیٹ جنرل کو بند کر دیا ہے۔

تفصیلات کے مطابق امریکی اسٹیٹ ڈیپارٹمنٹ کی جانب سے جاری کردہ بیان میں کہا گیا ہے کہ یہ فیصلہ پشاور میں امریکی سفارت کاروں کی سلامتی سے متعلق پائے جانے والے خدشات اور تحفظات کے پیش نظر کیا گیا ہے۔

بیان میں مزید کہا گیا ہے کہ پشاور میں امریکی سفارتی سرگرمیوں اور اس سے جڑی تمام مصروفیات کی نگرانی آئندہ اسلام آباد میں موجود امریکی سفارت خانہ کرے گا۔

اسٹیٹ ڈیپارٹمنٹ کے مطابق یہ اقدام اس بات کی عکاسی کرتا ہے کہ امریکہ کے لیے اپنے سفارتی عملے کی سلامتی انتہائی اہم ہے اور وہ اپنے وسائل کو زیادہ مؤثر انداز میں استعمال کرنا چاہتا ہے۔

پشاور پاکستان کے صوبے خیبر پختونخوا کا دارالحکومت ہے، جس کی سرحدیں افغانستان سے ملتی ہیں۔ حالیہ مہینوں میں اس صوبے میں متعدد ہلاکت خیز دہشت گرد حملے اور سکیورٹی فورسز و عسکریت پسندوں کے درمیان جھڑپیں رپورٹ ہوئی ہیں۔

پشاور میں قائم یہ امریکی قونصل خانہ افغانستان کے قریب امریکہ کی سفارتی اور تزویراتی موجودگی کا ایک اہم مرکز رہا ہے۔ اس نے 1980 کی دہائی میں سوویت یونین کے خلاف جنگ اور بعد ازاں 2001 میں نیٹو افواج کی افغانستان آمد کے بعد اہم کردار ادا کیا۔

سوویت یونین کی افغانستان میں شکست کے تناظر میں بھی اس قونصل خانے نے نمایاں کردار ادا کیا، جب افغانستان کی مزاحمتی سیاسی و مذہبی جماعتیں سرگرم تھیں۔ اس دوران مختلف گروہوں کے درمیان رابطوں کو منظم کرنے اور سوویت یونین کے خلاف معاونت کے حوالے سے بھی اس پلیٹ فارم کو استعمال کیا گیا۔