پشاور میں ایف سی ہیڈکوارٹر حملے کے پیچھے ممکنہ طور پر افغان شہری، آئی جی پولیس خیبر پختونخوا

پشاور (ڈیلی اردو ) پاکستان کے شورش ذدہ صوبے خیبر پختونخوا کے دارالحکومت پشاور میں فیڈرل کانسٹیبلری (ایف سی) ہیڈکوارٹرز پر ہونے والے خودکش حملے کے ذمہ دار ممکنہ طور پر افغان شہری ہیں، یہ بات آئی جی خیبر پختونخوا پولیس ذوالفقار حمید نے کہی۔ حملے میں 3 اہلکار ہلاک اور 12 زخمی ہوئے تھے۔

آئی جی کے مطابق دہشت گردوں نے حملے سے پہلے ایک جگہ رات گزاری تھی، سی سی ٹی وی فوٹیجز اور فنگر پرنٹس حاصل کر لی گئی ہیں، اور نادرا ان کی شناخت کی تصدیق کر رہا ہے۔ پولیس دہشت گردوں کے راستے اور سہولت کاروں کی تلاش میں ہے۔

انہوں نے کہا کہ خیبر پختونخوا پولیس کو جدید ہتھیار، ٹیکنالوجی، اینٹی ڈرون سسٹمز اور بلٹ پروف جیکٹس سے آراستہ کیا جا رہا ہے، اور پولیس فورس سخت حالات کے باوجود خطے میں امن قائم رکھنے کے لیے قربانیاں دے رہی ہے۔