پشاور میں سی ٹی ڈی کی کارروائی، 3 دہشت گرد ہلاک، دو فرار

پشاور (ڈیلی اردو ) کاؤنٹر ٹیررازم ڈیپارٹمنٹ (سی ٹی ڈی) خیبرپختونخوا نے پشاور میں کامیاب کارروائی کرتے ہوئے تین دہشت گردوں کو ہلاک کر دیا، جبکہ ان کے دو ساتھی فرار ہونے میں کامیاب ہو گئے۔

سی ٹی ڈی کے مطابق خیبرپختونخوا سے دہشت گردی کے مکمل خاتمے کے لیے انسپکٹر جنرل آف پولیس خیبرپختونخوا کی خصوصی ہدایات پر مختلف علاقوں میں ٹارگٹڈ آپریشنز جاری ہیں۔ انہی کارروائیوں کے تسلسل میں سی ٹی ڈی پشاور نے مصدقہ خفیہ اطلاع پر کامیاب آپریشن کیا۔

اعلامیے کے مطابق سی ٹی ڈی کو اطلاع ملی تھی کہ تھانہ متنی کی حدود میں اضاخیل روڈ، خون بابا قبرستان کے قریب چند شرپسند عناصر کسی بڑی تخریبی کارروائی کی منصوبہ بندی کر رہے ہیں۔ اطلاع پر سی ٹی ڈی کی اسپیشل ویپنز اینڈ ٹیکٹکس ٹیمز نے فوری کارروائی کی۔

سی ٹی ڈی کے مطابق کارروائی کے دوران دہشت گردوں نے پولیس پارٹی پر فائرنگ کی، جس پر پولیس نے دفاعی جوابی فائرنگ کی۔ فائرنگ کے تبادلے میں تین دہشت گرد ہلاک ہو گئے جبکہ دو فرار ہونے میں کامیاب ہو گئے۔

بعد ازاں علاقے کی تلاشی کے دوران تینوں دہشت گردوں کی لاشیں برآمد ہوئیں، جن کے قبضے سے تین کلاشنکوفیں اور نو میگزین بھی برآمد کیے گئے۔

انسپکٹر جنرل آف پولیس خیبرپختونخوا اور ایڈیشنل آئی جی سی ٹی ڈی نے کامیاب کارروائی پر سی ٹی ڈی کے جوانوں کو شاباش دیتے ہوئے کہا ہے کہ عوام کی جان و مال کے تحفظ کے لیے شرپسند عناصر کے خلاف مؤثر آپریشنز قابلِ تحسین ہیں، اور ایسے آپریشنز کا سلسلہ مزید تیز کیا جائے گا۔