پنجاب: اوکاڑہ میں سی ٹی ڈی کی کارروائی، القاعدہ سے تعلق رکھنے والا دہشت گرد گرفتار

لاہور (نمائندہ ڈیلی اردو) پاکستان کے صوبہ پنجاب کے ضلع اوکاڑہ میں کاؤنٹر ٹیررازم ڈیپارٹمنٹ (سی ٹی ڈی) نے خفیہ اطلاع پر کارروائی کرتے ہوئے کالعدم تنظیم القاعدہ سے تعلق رکھنے والے ایک دہشت گرد کو گرفتار کر لیا ہے۔

سی ٹی ڈی کے مطابق کارروائی کے دوران گرفتار شخص کے قبضے سے دو کلوگرام سے زائد بارودی مواد، ڈیٹونیٹرز، پرائما کارڈز، بیٹری، الیکٹرک سرکٹ اور ناجائز اسلحہ برآمد کیا گیا۔ برآمد شدہ بارودی مواد کو بم ڈسپوزل اسکواڈ کی مدد سے ناکارہ بنا دیا گیا۔

ترجمان سی ٹی ڈی کا کہنا ہے کہ گرفتار دہشت گرد کی شناخت جنید اشرف کے نام سے ہوئی ہے جو انور کالونی، ٹنڈو محمد خان کا رہائشی ہے۔

ابتدائی تفتیش کے مطابق ملزم شہر کے مختلف مقامات پر دہشت گردی کی منصوبہ بندی کر رہا تھا تاکہ خوف و ہراس پھیلایا جا سکے۔

سی ٹی ڈی نے ملزم کے خلاف انسدادِ دہشت گردی ایکٹ کے تحت مقدمہ درج کر کے مزید تفتیش شروع کر دی ہے۔