پنجاب بھر میں سی ٹی ڈی کی کارروائیاں: 36 مبینہ دہشت گرد گرفتار، دھماکہ خیز مواد اور دیگر سامان برآمد

لاہور (بیورو رپورٹ) کاؤنٹر ٹیررازم ڈیپارٹمنٹ (سی ٹی ڈی) پنجاب نے انٹیلی جنس اطلاعات کی بنیاد پر صوبے کے مختلف شہروں میں کارروائیاں کرتے ہوئے 36 مبینہ دہشت گردوں کو گرفتار کر لیا ہے۔

ترجمان سی ٹی ڈی کے مطابق کارروائیاں لاہور، بہاولپور، ننکانہ صاحب، راولپنڈی، میانوالی، گوجرانوالہ، جہلم، نارووال، قصور، فیصل آباد، پاکپتن، سرگودھا اور ساہیوال میں کی گئیں۔

لاہور سے دو اور بہاولپور سے کالعدم تحریک طالبان پاکستان کا ایک خطرناک دہشت گرد دھماکہ خیز مواد سمیت گرفتار کیا گیا۔ گرفتار دہشت گردوں سے بارودی مواد، ایک ہینڈ گرنیڈ، 18 ڈیٹونیٹر، 51 فٹ تار، نو آئی ای ڈی بم، پمفلٹس، نقدی اور پرائما کارڈ برآمد کیے گئے۔

ترجمان نے بتایا کہ گرفتار دہشت گردوں کی شناخت محمد اشفاق، اسماعیل خان، نصیر اللہ، ارشاد اللہ، محمد ثاقب، محمد اسجد، محمد شعیب، عزیز اللہ، محبوب شاہ، غفران، عطا محمد، سلیمان معاویہ اور دیگر کے ناموں سے ہوئی ہے۔

حکام کے مطابق دہشت گرد قانون نافذ کرنے والے اداروں اور حساس مقامات پر حملوں کی مکمل منصوبہ بندی کر چکے تھے، تاہم بروقت کارروائی کے باعث ممکنہ تباہی سے بچا لیا گیا۔

سی ٹی ڈی کے مطابق رواں ماہ کے دوران 5045 کومبنگ آپریشنز میں 604 مشتبہ افراد کو گرفتار کیا گیا جبکہ 2 لاکھ 9 ہزار 518 افراد سے تفتیش کی گئی۔

ترجمان سی ٹی ڈی کا کہنا ہے کہ محکمہ “محفوظ پنجاب” کے ہدف پر عمل پیرا ہے اور دہشت گردی کے ناسور کو جڑ سے اکھاڑ پھینکنے کے لیے پرعزم ہے۔

ساہیوال میں علیحدہ کارروائی

علاوہ ازیں، 30 مئی کو پنجاب کے ضلع ساہیوال میں سی ٹی ڈی نے ایک انٹلی جنس بیسڈ آپریشن کے دوران دو دہشت گردوں کو گرفتار کیا۔ گرفتار افراد سے ممنوعہ لٹریچر اور اسلحہ خریدنے کے لیے رقم برآمد ہوئی ہے۔

ترجمان کے مطابق گرفتار دہشت گردوں کی شناخت فواد مقیت اور عبداللہ کے نام سے ہوئی ہے۔ فواد ناظم آباد کراچی جبکہ عبداللہ کا تعلق کوہاٹ سے بتایا گیا ہے۔

دونوں کے خلاف مقدمہ درج کر کے تفتیش کا دائرہ وسیع کر دیا گیا ہے تاکہ ممکنہ نیٹ ورک اور سہولت کاروں تک پہنچا جا سکے۔