پنجاب: ساہیوال سے القاعدہ کا مبینہ دہشت گرد گرفتار، ممبر شپ کارڈ برآمد

واشنگٹن (ش ح ط) پاکستان کے صوبہ پنجاب کے ضلع ساہیوال میں کاؤنٹر ٹیررازم ڈیپارٹمنٹ (سی ٹی ڈی) نے انٹیلیجنس بیسڈ کارروائی کرتے ہوئے کالعدم تنظیم القاعدہ سے تعلق رکھنے والے ایک مبینہ خطرناک دہشت گرد کو گرفتار کر لیا۔

سی ٹی ڈی حکام کے مطابق گرفتار ملزم کے قبضے سے تقریباً 3 کلو دھماکہ خیز مواد، تیار شدہ الیکٹرک سرکٹ، ڈیٹونیٹر، بیٹریاں، اسلحہ اور نقدی برآمد ہوئی ہے۔

حکام کا کہنا ہے کہ ملزم خیبر پختونخوا کے قبائلی ضلع خیبر سے ساہیوال تخریب کاری کی غرض سے آیا تھا۔ خفیہ اطلاع ملنے پر سی ٹی ڈی نے کارروائی کرتے ہوئے اسے گرفتار کیا۔

سی ٹی ڈی کے مطابق ملزم پیر محمد ولی کی تلاشی کے دوران اس کے کندھے پر لٹکے شولڈر بیگ سے ایک دیسی ساختہ بم (آئی ای ڈی) بھی برآمد ہوا۔ بیگ سیاہ ٹیپ سے لپٹا ہوا تھا جس میں الیکٹرک سرکٹ، الیکٹرک بلب، ڈیٹونیٹر، وائرنگ، 9 وولٹ بیٹری اور دیگر سامان موجود تھا۔ 

حکام کے مطابق برآمد شدہ آئی ای ڈی کا وزن تقریباً 2152 گرام تھا۔

مزید تلاشی کے دوران ملزم کے قبضے سے کالعدم تنظیم القاعدہ کا مبینہ ممبرشپ کارڈ، قومی شناختی کارڈ اور 2550 روپے نقد بھی برآمد کیے گئے۔

سی ٹی ڈی حکام کے مطابق ملزم کے خلاف انسداد دہشت گردی ایکٹ کے تحت مقدمہ درج کر لیا گیا ہے جبکہ مزید تفتیش جاری ہے تاکہ اس کے ممکنہ سہولت کاروں اور نیٹ ورک کے دیگر افراد تک رسائی حاصل کی جا سکے۔