چار ملکی ’بدر‘ دفاعی معاہدہ طے پا گیا: پاکستان، ترکیہ، قطر اور انڈونیشیا کا بڑا عسکری اتحاد!

دوحہ / اسلام آباد(ڈیلی اردو) پاکستان، قطر، ترکیہ اور انڈونیشیا نے دفاعی پیداوار اور عسکری صلاحیتوں کو فروغ دینے کے لیے بدھ کے روز ایک کثیرالجہتی دفاعی معاہدے پر دستخط کر دیے ہیں۔ ترکیہ کی وزارتِ دفاع کے مطابق چاروں برادر ممالک کے مابین طے پانے والی اس باہمی مفاہمتی یادداشت کو ’بدر میمورنڈم آف انڈرسٹینڈنگ‘ کا نام دیا گیا ہے۔

معاہدے پر دستخط کی باوقار تقریب قطر میں منعقد ہوئی، جس میں چاروں ممالک کے اعلیٰ عسکری و حکومتی نمائندوں نے شرکت کی۔ پاکستان کی جانب سے وزیرِ دفاع خواجہ آصف نے اس اہم دستاویز پر دستخط کیے، جبکہ دیگر دستخط کنندگان میں ترک وزیرِ دفاع یاشار گولر، قطر کے نائب وزیرِ اعظم و وزیرِ مملکت برائے دفاعی امور شیخ سعود بن عبدالرحمٰن، اور انڈونیشیا کے نائب وزیرِ دفاع یوسف جوہری شامل تھے۔ تقریب میں ترکیہ کے سیکریٹریٹ آف ڈیفنس انڈسٹریز کے سربراہ ہالوک گورگون بھی موجود تھے۔

ترک وزارتِ دفاع کے حوالے سے بتایا گیا ہے کہ اس کثیرالجہتی معاہدے کا بنیادی مقصد چاروں ممالک کے مابین دفاعی تعاون کو وسعت دینا اور دفاعی صلاحیتوں کو باہم مربوط اور مضبوط بنانا ہے۔ یہ معاہدہ عسکری مشقوں، پیشہ ورانہ تربیت، مشترکہ تحقیق و ترقی (R&D) اور متعلقہ ممالک کی دفاعی صنعتوں کے معیار کو جدید خطوط پر استوار کرنے کے لیے مشترکہ کوششوں میں کلیدی کردار ادا کرے گا۔

ترک خبر رساں ایجنسی انادولو کے مطابق، یہ یادداشتِ مفاہمت جدید ترین دفاعی نظاموں اور ابھرتی ہوئی عسکری ضروریات سے ہم آہنگ حل تلاش کرنے اور مقامی دفاعی صنعتی شعبوں کو عالمی سطح پر مسابقت کے قابل بنانے میں معاون ثابت ہوگی۔ اس اقدام کو خطے اور مسلم دنیا میں خود انحصاری اور جدید عسکری اشتراک کی جانب ایک بڑا تزویراتی سنگِ میل قرار دیا جا رہا ہے۔