چارسدہ میں سی ٹی ڈی کا آپریشن، ٹی ٹی پی کے 3 مطلوب دہشت گرد ہلاک

چارسدہ (ڈیلی اردو رپورٹ) پاکستان کے شورش زدہ صوبہ خیبر پختونخوا کے ضلع چارسدہ کی تحصیل شبقدر میں کاؤنٹر ٹیررازم ڈیپارٹمنٹ (سی ٹی ڈی) نے خفیہ اطلاع پر کارروائی کرتے ہوئے کالعدم تحریک طالبان پاکستان (ٹی ٹی پی) سے تعلق رکھنے والے تین مطلوب دہشت گردوں کو ہلاک کر دیا۔

سی ٹی ڈی حکام کے مطابق کارروائی کے دوران دہشت گردوں اور اہلکاروں کے درمیان فائرنگ کا تبادلہ ہوا، جس کے نتیجے میں تین دہشت گرد ہلاک ہو گئے جبکہ ان کے بعض ساتھی فرار ہونے میں کامیاب رہے۔

ہلاک ہونے والے دہشت گردوں کی شناخت حیات خان عرف حیات اللہ، عاصم اور امین اللہ عرف معاویہ عرف قاری کے ناموں سے ہوئی ہے۔

سی ٹی ڈی کے مطابق حیات خان مولانا عزت اللہ کے ٹارگٹ کلنگ کیس میں مطلوب اور اشتہاری تھا، جبکہ عاصم ضلع خیبر میں پولیس اہلکاروں اور مذہبی رہنماؤں کو نشانہ بنانے کے متعدد واقعات میں مطلوب تھا۔

کارروائی کے بعد ہلاک دہشت گردوں کے قبضے سے تین کلاشنکوفیں، دستی بم اور دیگر اسلحہ و گولہ بارود برآمد کر لیا گیا۔

حکام کا کہنا ہے کہ فرار ہونے والے دہشت گردوں کی گرفتاری کے لیے علاقے میں سرچ آپریشن جاری ہے جبکہ ہلاک افراد کے دیگر دہشت گرد کارروائیوں میں ملوث ہونے کے حوالے سے بھی تحقیقات کی جا رہی ہیں۔

سی ٹی ڈی کے مطابق صوبے میں دہشت گردی کے خطرات کے پیش نظر انٹیلی جنس بیسڈ آپریشنز کا سلسلہ جاری رکھا جائے گا تاکہ امن و امان کی صورتحال کو یقینی بنایا جا سکے۔