ڈیرہ اسماعیل خان اور بنوں میں سکیورٹی فورسز کے آپریشنز، 9 شدت پسند ہلاک

راولپنڈی (ک م)پاکستانی سکیورٹی فورسز نے شورش زدہ صوبے خیبر پختونخوا میں شدت پسندوں کے خلاف دو مختلف کارروائیوں کے دوران نو شدت پسندوں کو ہلاک کر دیا۔

پاک فوج کے شعبہ تعلقاتِ عامہ (آئی ایس پی آر) کے مطابق 19 دسمبر کو خیبر پختونخوا میں خفیہ اطلاعات کی بنیاد پر دو الگ الگ کارروائیاں کی گئیں۔

ڈیرہ اسماعیل خان

آئی ایس پی آر کے بیان کے مطابق پہلی کارروائی ضلع ڈیرہ اسماعیل خان میں کی گئی، جہاں شدت پسندوں کی موجودگی کی اطلاع پر انٹیلی جنس بیسڈ آپریشن کیا گیا۔ شدید فائرنگ کے تبادلے کے بعد چار شدت پسند ہلاک ہو گئے۔

بنوں

بیان میں بتایا گیا کہ دوسری کارروائی ضلع بنوں میں کی گئی، جہاں سکیورٹی فورسز اور شدت پسندوں کے درمیان فائرنگ کے تبادلے میں مزید پانچ شدت پسند ہلاک ہوئے۔

آئی ایس پی آر کے مطابق ہلاک ہونے والے شدت پسندوں کے قبضے سے اسلحہ اور گولہ بارود بھی برآمد ہوا۔ بیان میں کہا گیا کہ یہ شدت پسند سکیورٹی فورسز، قانون نافذ کرنے والے اداروں اور معصوم شہریوں کے خلاف دہشت گردی اور ٹارگٹ کلنگ میں ملوث رہے۔

آئی ایس پی آر نے مزید بتایا کہ علاقے میں کلیئرنس اور سرچ آپریشنز جاری ہیں، جبکہ ہلاک ہونے والے شدت پسندوں کا تعلق کالعدم تحریک طالبان پاکستان (ٹی ٹی پی) سے بتایا جاتا ہے۔