ڈیرہ اسماعیل خان: دہشت گردوں کے ہاتھوں اغوا کے بعد ملنگ عباس کی تشدد زدہ لاش برآمد

نوٹ (اس تحریر کا مواد بعض قارئین کے لیے تکلیف دہ ہو سکتا ہے۔)

واشنگٹن (ش ح ط) پاکستان کے شورش زدہ صوبہ  خیبرپختونخوا کے ضلع ڈیرہ اسماعیل خان کی تحصیل کلاچی سے دو روز قبل اغوا ہونے والے ملنگ عباس عرف ملنگی کی تشدد زدہ لاش برآمد ہو گئی ہے۔

مقامی ذرائع کے مطابق مسلح دہشت گردوں نے علاقے میں ملنگ عباس کی تلاش شروع کی اور امام بارگاہ کے قریب دو دکانداروں کو بھی تشدد کا نشانہ بنایا۔ 

دکانداروں کے مطابق حملہ آور بار بار ملنگی کے بارے میں پوچھتے رہے اور انکار پر انہیں دھمکیاں دی گئیں کہ اگر معلومات نہ دی گئیں تو جان سے مار دیا جائے گا۔

ذرائع کے مطابق کچھ ہی دیر بعد مسلح دہشت گردوں اس کی کباڑ کی دکان تک پہنچے اور اسے اس کے بیٹے کے سامنے شدید تشدد کا نشانہ بنانے کے بعد اپنے ساتھ لے گئے۔

دو روز بعد شام کے وقت ملنگ عباس عرف ملنگی کی مسخ شدہ اور تشدد زدہ لاش برآمد ہوئی۔

عینی شاہدین کے مطابق لاش پر انسانیت سوز تشدد کے واضح نشانات تھے۔ کمر پر زنجیروں کے گہرے نشانات موجود تھے جبکہ انہیں چھریوں سے کاٹے جانے کے آثار بھی پائے گئے۔ جسم کا کوئی حصہ ایسا نہیں تھا جہاں زخم نہ ہوں۔ جبڑا ٹوٹا ہوا تھا، ایک آنکھ ضائع ہو چکی تھی جبکہ سر پر شدید چوٹوں کے نشانات موجود تھے۔

مقامی افراد کے مطابق یہ منظر انتہائی ہولناک تھا اور علاقے میں شدید خوف و ہراس پایا جاتا ہے۔

ملنگ عباس اپنے پیچھے تین کمسن بچوں کو سوگوار چھوڑ گیا، جن میں 11 سالہ بیٹی اور دو بیٹے (8 اور 4 سال) شامل ہیں۔

ان کی نماز جنازہ کوٹلی امام حسین میں ادا کی گئی، جس میں بڑی تعداد میں لوگوں نے شرکت کی۔

واضح رہے کہ ڈیرہ اسماعیل خان کے علاقے کلاچی میں کالعدم تحریک طالبان پاکستان کا گنڈا پور گروپ متحرک ہے۔