ڈیرہ اسماعیل خان میں ایف سی ہیڈکوارٹر پر ڈرون حملہ، ایک اہلکار ہلاک، دو زخمی

ڈی آئی خان (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع ڈیرہ اسماعیل خان میں فیڈرل کانسٹیبلری (ایف سی) کے ہیڈکوارٹر پر عسکریت پسندوں کی جانب سے کواڈ کاپٹر کے ذریعے حملہ کیا گیا، جس کے نتیجے میں ایک اہلکار ہلاک جبکہ دو جوان زخمی ہو گئے۔

ڈیلی اردو کے مطابق یہ واقعہ تحصیل درازندہ میں پیش آیا، جہاں ایف سی ہیڈکوارٹر کے مین گیٹ پر کواڈ کاپٹر کے ذریعے دو گولے فائر کیے گئے۔ گولے گرنے کے نتیجے میں حوالدار امجد موقع پر ہی ہلاک ہو گئے۔

پولیس ذرائع کے مطابق حملے میں دو ایف سی جوان زخمی بھی ہوئے ہیں، جنہیں فوری طور پر قریبی ہسپتال منتقل کر دیا گیا ہے۔

پولیس کا کہنا ہے کہ واقعے کے بعد علاقے میں سرچ آپریشن شروع کر دیا گیا ہے جبکہ کواڈ کاپٹر کی پرواز کی سمت اور حملہ آوروں کا سراغ لگانے کی کوششیں جاری ہیں۔