ڈیرہ اسماعیل خان میں دہشت گردوں کا پولیس اسٹیشن پر حملہ

ڈی آئی خان (ڈیلی اردو) پاکستان کے شورش زدہ صوبہ خیبر پختونخوا کے ضلع ڈیرہ اسماعیل خان میں پولیس نے تھانہ یارک پر کالعدم تحریک طالبان پاکستان (ٹی ٹی پی) کے گنڈا پور گروپ سے منسوب دہشت گردوں کا حملہ ناکام بنا دیا۔

پولیس حکام کے مطابق دہشت گردوں نے رات کی تاریکی میں تین مختلف سمتوں سے تھانے پر حملہ کیا اور چھوٹے اور بڑے جدید ہتھیاروں سے شدید فائرنگ کی۔ تاہم، ڈیوٹی پر موجود پولیس اہلکاروں نے فوری اور مؤثر جوابی کارروائی کرتے ہوئے حملہ آوروں کو پسپا ہونے پر مجبور کر دیا، جس کے بعد وہ فرار ہو گئے۔

ترجمان پولیس کے مطابق دونوں جانب سے تقریباً 40 منٹ تک فائرنگ کا تبادلہ جاری رہا، تاہم پولیس کی بروقت پوزیشننگ اور مؤثر حکمت عملی کے باعث حملے میں کسی قسم کا جانی نقصان نہیں ہوا اور تمام اہلکار محفوظ رہے۔

واقعے کی اطلاع ملتے ہی ڈسٹرکٹ پولیس آفیسر (ڈی پی او) ضیا الدین احمد موقع پر پہنچ گئے اور پولیس اہلکاروں کی بہادری، فرض شناسی اور مستعدی کو سراہا۔

ڈی پی او نے کہا کہ پولیس فورس دہشت گردی کے خلاف پوری قوت کے ساتھ برسرپیکار ہے اور خطے میں امن کے قیام کے لیے اپنی ذمہ داریاں بھرپور انداز میں ادا کرتی رہے گی۔