ڈیرہ اسماعیل خان میں سیکیورٹی فورسز کا آپریشن، کمانڈر سمیت 10 دہشت گرد ہلاک

ڈی آئی خان (نمائندہ ڈیلی اردو) پاکستان کے شورش زدہ صوبے خیبرپختونخوا کے ضلع ڈیرہ اسماعیل خان میں سیکیورٹی فورسز نے انٹیلی جنس بیسڈ آپریشن کے دوران فتنۃ الخوارج کے سرغنہ عالم محسود سمیت 10 دہشت گرد ہلاک جبکہ 4 کو زخمی کر دیا۔

ڈیلی اردو کے مطابق سیکیورٹی ذرائع نے بتایا کہ کارروائی کلاچی کے علاقے میں اس وقت کی گئی جب فورسز کو علاقے میں دہشت گردوں کی موجودگی کی مصدقہ اطلاع ملی۔ آپریشن کے دوران فورسز اور دہشت گردوں کے درمیان شدید فائرنگ کا تبادلہ ہوا۔

سیکیورٹی ذرائع کے مطابق ہلاک کیے گئے چار دہشت گردوں کا تعلق افغانستان سے ہے جبکہ تمام دہشت گرد کالعدم تحریک طالبان پاکستان (ٹی ٹی پی) گنڈاپور گروپ سے وابستہ تھے۔ پاکستان کی سرکاری اصطلاح میں ایسے عسکریت پسندوں کو خوارج کہا جاتا ہے۔

ذرائع نے بتایا کہ کارروائی کے بعد دہشت گردوں کے قبضے سے بھاری مقدار میں بارودی مواد، خودکش جیکٹس، آئی ای ڈیز اور مختلف نوعیت کا اسلحہ برآمد ہوا۔

مزید بتایا گیا کہ سرغنہ عالم محسود 2008 میں نواز کوٹ پوسٹ حملے میں ملوث تھا اور وہ بنوں جیل اور آرمی پوسٹ پر حملوں میں بھی شریک رہا۔

سیکیورٹی فورسز نے علاقے کو مزید سرچ آپریشن کے لیے گھیرے میں لے لیا ہے اور مشتبہ ٹھکانوں کی تلاش جاری ہے۔