ڈیرہ اسماعیل خان: پولیس کے سرچ آپریشن میں اغوا کیے گئے 14 مزدور بازیاب

ڈی آئی خان (ڈیلی اردو) پاکستان کے شورش زدہ صوبے خیبر پختونخوا کے ضلع ڈیرہ اسماعیل خان کے علاقے پہاڑپور میں مزدوروں کے اغوا کی اطلاع پر پولیس نے فوری کارروائی کرتے ہوئے سرچ آپریشن کیا، جس کے دوران اغوا کیے گئے تمام 14 مزدوروں کو بحفاظت بازیاب کرلیا گیا۔

ترجمان پولیس کے مطابق واقعہ سیدووالی کے علاقے میں پیش آیا، جہاں اغوا کاروں نے مزدوروں کو اغوا کیا۔ اطلاع ملتے ہی پولیس نے علاقے کو گھیرے میں لے کر سرچ اینڈ اسٹرائیک آپریشن شروع کیا۔ آپریشن کے دوران اغوا کاروں اور پولیس کے درمیان فائرنگ کا تبادلہ بھی ہوا۔

ضلعی پولیس سربراہ سجاد احمد صاحبزادہ کی نگرانی میں جاری آپریشن کے نتیجے میں تمام مغوی مزدوروں کو بحفاظت بازیاب کرا لیا گیا۔ پولیس کا کہنا ہے کہ علاقے میں سرچ آپریشن مزید وسیع کردیا گیا ہے۔

ڈی پی او نے ایس پی پہاڑپور، ایس پی کاؤنٹر ٹیررازم ڈپارٹمنٹ (CTD)، ڈپٹی سپرنٹنڈنٹس اور تمام شریک پولیس ٹیموں کی پیشہ ورانہ کارکردگی کو سراہا۔

ان کا کہنا تھا کہ عوام کے جان و مال کا تحفظ پولیس کی ذمہ داری ہے اور کسی کو قانون ہاتھ میں لینے کی اجازت نہیں دی جائے گی۔