ڈیرہ اسماعیل خان، ٹانک اور جنوبی وزیرستان میں آپریشن، 2 فوجی اور 2 دہشت گرد ہلاک، 3 گرفتار

راولپنڈی (کاشف محمود) صوبہ خیبرپختونخوا کے ضلع ڈیرہ اسماعیل خان اور قبائلی ضلع جنوبی وزیرستان میں سیکیورٹی فورسز نے دہشت گردوں کے خلاف کارروائی کرتے ہوئے 2 دہشت گردوں کو ہلاک اور 3 کو گرفتار کرلیا۔

پاکستانی فوج کے شعبہ تعلقات عامہ (آئی ایس پی آر) سے جاری بیان میں کہا گیا کہ سیکیورٹی فورسز نے خفیہ اطلاع کی بنیاد پر ڈیرہ اسماعیل خان، ضلع ٹانک اور جنوبی وزیرستان کے گاؤں کوٹ کلی میں کارروائیاں کی۔

بیان میں کہا گیا کہ مذکورہ علاقوں میں دہشت گردوں کی موجودگی کی اطلاع ملی تھی۔

آئی ایس پی آر نے کہا کہ شدید فائرنگ کے تبادلے میں دو دہشت گرد مارے گئے اور 3 زخمی ہوگئے جبکہ ایک دہشت گرد نے سیکیورٹی فورسز کے سامنے ہتھیار ڈال دیا۔

بیان میں کہا گیا کہ دہشت گردوں کے قبضے میں دھماکہ خیز مواد، ڈیوائسز اور راکٹوں سمیت بڑے پیمانے میں اسلحہ بھی برآمد کرلیا گیا۔

آئی ایس پی آر نے بتایا کہ دہشت گردوں سے فائرنگ کے تبادلے کے دوران کرک سے تعلق رکھنے والے 31 سالہ سپاہی فریداللہ اور ڈیرہ اسماعیل خان سے تعلق رکھنے والے 29 سالہ سپاہی شعیب ہلاک ہوگئے۔

خیال رہے 31 دسمبر کو سیکیورٹی فورسز نے 2 الگ الگ کارروائیوں میں 2 دہشت گردوں کو ہلاک اور ایک کو گرفتار کر لیا تھا جبکہ دہشت گردوں کے ساتھ فائرنگ کے تبادلے میں 4 فوجی اہلکار ہلاک ہوگئے تھے۔