ڈیرہ غازی خان: کمسن بچے سے زیادتی کرنے والا امام مسجد گرفتار

ڈی جی خان (نمائندہ ڈیلی اردو) پاکستان کے صوبہ پنجاب کے ضلع ڈیرہ غازی خان میں کم سن بچے سے زیادتی کرنے والے امام مسجد کو رنگے ہاتھوں گرفتار کر لیا گیا۔

ڈیرہ غازی خان کے تھانہ دراہمہ کی حدود میں، بستی کالجوں کے قریب واقع ایک مقامی مسجد کے امام، مولوی ناصر حسین، پر الزام ہے کہ انہوں نے 12 سالہ بچے کے ساتھ مسجد کے اندر جنسی زیادتی کی کوشش کی۔ 

واقعے کی ویڈیو سوشل میڈیا پر وائرل ہونے کے بعد تھانہ دراہمہ پولیس نے فوری کارروائی کرتے ہوئے ملزم کو گرفتار کر لیا۔

تھانہ دراہمہ کے ایس ایچ او شاہد اقبال نے ڈیلی اردو کو بتایا کہ متاثرہ بچے کے والد محمد دلشاد کی مدعیت میں مقدمہ درج کر کے قانونی کارروائی شروع کر دی گئی ہے۔ 

ابتدائی تحقیقات کے دوران تصدیق ہوئی کہ واقعہ مسجد کے اندر پیش آیا۔ پولیس نے ویڈیو کے فرانزک تجزیے اور دیگر شواہد اکٹھے کرنے کے ساتھ متاثرہ بچے کا طبی معائنہ بھی کرایا ہے تاکہ مقدمہ مضبوط بنایا جا سکے۔

ڈی پی او ڈیرہ غازی خان صادق علی نے واقعے کا سخت نوٹس لیتے ہوئے کہا کہ بچوں سے زیادتی جیسے گھناؤنے جرائم کسی صورت برداشت نہیں کیے جائیں گے اور ایسے درندہ صفت عناصر کے خلاف زیرو ٹالرنس پالیسی اپنائی جائے گی۔

علاقے کے شہریوں نے بھی اس واقعے پر شدید تشویش کا اظہار کیا اور مطالبہ کیا کہ ملزم کو قانون کے مطابق سخت سزا دی جائے۔ پولیس نے یقین دہانی کرائی ہے کہ کیس کی تفتیش شفافیت اور میرٹ کے مطابق مکمل کی جائے گی۔