کالعدم تحریک لبیک پاکستان نے پابندی کے خلاف اپیل کردی

لاہور (ڈیلی اردو) کالعدم جماعت تحریک لبیک پاکستان (ٹی ایل پی) نے پابندی کے خلاف حکومت کو اپیل کردی، اپیل انسداد دہشتگردی ایکٹ مجریہ 1997 کے تحت کی گئی ہے۔

ذرائع کے مطابق کالعدم تحریک لبیک پاکستان کا درخواست میں موقف ہے کہ ہمارا دہشت گردی سے کوئی تعلق نہیں، تحریک لبیک پاکستان الیکشن کمیشن میں رجسٹرڈ سیاسی جماعت ہے۔

ذرائع کا بتانا ہے کہ پابندی کے خلاف کالعدم تحریک لبیک کی درخواست کاجائزہ لینے کیلئے کل وزارت داخلہ میں اجلاس طلب کرلیا گیا ہے، سیکریٹری داخلہ یوسف نسیم کھوکھر جائزہ اجلاس کی صدارت کریں گے۔

واضح رہے کہ تحریک لبیک پاکستان کے سربراہ سعد رضوی کی 12 اپریل کو گرفتاری کے بعد ملک کے مختلف حصوں باالخصوص پنجاب میں ردعمل دیکھنے میں آیا تھا، پولیس پر حملے کیے گئے، پولیس والوں کو اغوا کیا گیا اور پھر وفاقی حکومت نے اس جماعت کو کالعدم قرار دینے کا اعلان کیا۔

وفاقی وزیر برائے امورِ داخلہ شیخ رشید احمد کا کہنا تھا کہ تحریکِ لبیک پر پابندی لگانے کا فیصلہ انسدادِ دہشتگردی ایکٹ کے تحت کیا گیا ہے۔

انہوں نے بتایا تھا کہ وفاقی حکومت نے اینٹی ٹیرر ازم ایکٹ 1997ء کے رُول 11 بی کے تحت تحریکِ لبیک پاکستان پر پابندی لگانے کا فیصلہ کیا۔

وفاقی وزیر کا مزید کہنا تھا کہ تحریک لبیک کالعدم قرا ر دیئے جانے کے خلاف 30 دن میں اپیل کرسکتی ہے۔ اس جماعت کو کالعدم قرار دئیے جانے کا اعلان 19 اور 20 اپریل کی درمیانی شب اسی وقت کمزور پڑ گیا جب اس جماعت کے عہدیداروں سے لاہور میں مذاکرات کر کے ان کے مطالبات مان لیے گئے۔