کراچی میں سی ٹی ڈی کا آپریشن، خودکش بمبار گرفتار، جیکٹ برآمد

کراچی (نمائندہ ڈیلی اردو) پاکستان کے صوبہ سندھ کے دارالحکومت کراچی میں کاؤنٹر ٹیررازم ڈیپارٹمنٹ (سی ٹی ڈی) نے کارروائی کرتے ہوئے کالعدم تحریک طالبان پاکستان (ٹی ٹی پی) سے تعلق رکھنے والے مبینہ خودکش بمبار کو گرفتار کر لیا ہے۔

سی ٹی ڈی کے مطابق گرفتار خودکش بمبار، مطلوب دہشت گرد زعفران کا قریبی ساتھی رہا ہے۔ 

ترجمان کا کہنا ہے کہ ملزم نے اپنے ساتھیوں کے ہمراہ سائٹ ایریا میں کام کرنے والے غیر ملکی شہریوں پر فائرنگ کی تھی، جس کے نتیجے میں متعدد افراد زخمی ہوئے تھے۔

ترجمان سی ٹی ڈی کے مطابق ملزم کے قبضے سے ایک خودکش جیکٹ، حساس مقامات کی تصاویر اور نقشے برآمد ہوئے ہیں۔ ترجمان سی ٹی ڈی نے بتایا کہ مطلوب دہشت گرد زعفران سی ٹی ڈی کے ساتھ مقابلے میں ہلاک ہو چکا ہے اور اس کے سر کی قیمت ایک کروڑ روپے مقرر تھی۔

سی ٹی ڈی کے مطابق گرفتار ملزم سلمان اور اس کے دیگر ساتھیوں کو کراچی میں ایک بڑی خودکش دہشت گرد کارروائی کے لیے بھیجا گیا تھا۔ ملزم کے بعض ساتھی بعد میں کراچی پہنچنے والے تھے۔

ترجمان کے مطابق ملزم کا ایک ساتھی 2025 میں کوئٹہ میں ایف سی پر خودکش حملے میں مارا گیا جبکہ دوسرا ساتھی گزشتہ سال ڈی آئی خان پولیس ٹریننگ سینٹر پر خودکش حملے میں ہلاک ہوا۔

سی ٹی ڈی کے مطابق ملزم نے افغانستان میں خودکش حملوں کی تربیت حاصل کی تھی اور مبینہ طور پر مولوی مخلص یار کے حکم پر اپنے ساتھی ادریس عرف اسد اللہ کے ہمراہ کراچی آیا تھا۔ منصوبے کے تحت پہلے ٹارگٹ کلنگ اور بعد ازاں خودکش حملوں کی کارروائیاں کی جانی تھیں۔

سی ٹی ڈی نے بتایا کہ ملزم کے دیگر ساتھیوں اور سہولت کاروں کی گرفتاری کے لیے مشترکہ ٹیمیں تشکیل دے دی گئی ہیں جبکہ مختلف مقامات پر چھاپے مارے جا رہے ہیں۔ تحقیقات جاری ہیں۔