کراچی: ندی سے انسانی سر برآمد، کچھ روز پہلے ملنے والا دھڑ معمہ بن گیا

کراچی (ڈیلی اردو) پاکستان کے صوبہ سندھ کے صوبائی حکومت کراچی کے علاقے مچھر کالونی میں اللہ والی مسجد کے قریب ندی سے ایک انسانی سر ملنے پر شہر بھر میں خوف و ہراس پھیل گیا۔ 

ایدھی ایمبولینس کے ذریعے سر کو ڈاکس تھانے منتقل کیا گیا جہاں پولیس نے فوری تفتیش شروع کر دی۔

ایس ایچ او ڈاکس نند لال کے مطابق سر کی عمر تقریباً 35 سے 40 سال بتائی جا رہی ہے، تاہم اس کی شناخت فی الحال ممکن نہیں ہو سکی۔

حیران کن بات یہ ہے کہ چند روز قبل گلشن اقبال بلاک 5 میں ایک انسانی دھڑ بھی ملا تھا، جس نے شہریوں میں شدید بے چینی پیدا کر دی تھی۔ 

پولیس اب ڈی این اے ٹیسٹ کے ذریعے یہ پتہ لگانے کی کوشش کر رہی ہے کہ آیا دونوں اعضا ایک ہی شخص کے ہیں یا شہر میں کسی اور خوفناک سلسلے کا آغاز ہو چکا ہے۔

پولیس حکام کا کہنا ہے کہ تحقیقات تیزی سے جاری ہیں اور کچھ بھی قبل از وقت کہنا ممکن نہیں، تاہم اہلِ علاقہ اس واقعے کے بعد شدید خوف اور اضطراب میں مبتلا ہیں۔