کرم: مسافر گاڑیوں پر فائرنگ کے واقعے میں ہلاکتوں کی تعداد 16 ہو گئی

پشاور (نمائندہ ڈیلی اردو/اے ایف پی) پاکستان کے صوبے خیبر پختونخوا کے قبائلی ضلع کرم میں ایک تازہ فرقہ وارانہ تصادم میں تین خواتین اور دو بچوں سمیت کم از کم 16 افراد ہلاک ہو گئے۔

یہ اس فرقہ وارانہ خونریزی کے دوران ہونے والی تازہ ترین ہلاکتیں ہیں، جس نے اس ضلع کو کئی مہنیوں سے اپنی لپیٹ میں لے رکھا ہے۔ کرم میں سنی اور شیعہ قبائل کے مابین وقفے وقفے سے لڑائی جاری ہے۔ پہلے ایک نیم خود مختار علاقے یا قبائلی ایجنسی کی حیثیت رکھنے والا ضلع کرم سنی اور شیعہ فرقوں سے تعلق رکھنے والے قبائل کے درمیان خونریز تصادم کی تاریخ رکھتا ہے۔

اس وجہ سے گزشتہ برسوں کے دوران سینکڑوں جانیں ضائع ہو چکی ہیں۔ کرم کی انتظامیہ کے ایک سینیئر اہلکار نے اپنا نام ظاہر نہ کرنے کی شرط پر خبر رساں ادارے اے ایف پی کو بتایا کہ سنیوں کا ایک قافلہ ہفتے کے روز نیم فوجی دستوں کی حفاظت میں سفر کر رہا تھا کہ وہ حملے کی زد میں آ گیا۔

اس اہلکار کا کہنا تھا، ”اس کے نتیجے میں، تین خواتین اور دو بچوں سمیت چودہ افراد ہلاک اور چھ دیگر زخمی ہو گئے۔‘‘ انہوں نے کہا کہ فرنٹیئر پولیس نے جوابی کارروائی کرتے ہوئے حملہ آوروں میں سے دو کو ہلاک کر دیا، جن میں ایک کی شناخت کالعدم زینبیون بریگیڈ کے کمانڈر ارشاد حسین عرف قلندر کے طور پر کی گئی ہے۔

اس ہلکار نے مزید کہا کہ تازہ ترین حملے کے ”فرقہ وارانہ مقاصد‘‘ تھے، جنہوں نے اس ”خطے کو گزشتہ دو دہائیوں سے اپنی لپیٹ میں لے رکھا ہے اور جن کی وجہ سے ہر تنازعہ فرقہ وارانہ جہت اختیار کر لیتا ہے۔‘‘

خیال رہے کہ رواں برس جولائی اور ستمبر کے مہینوں میں ہونے والی مسلح جھڑپوں میں بھی درجنوں افراد ہلاک ہو گئے تھےاور پھر ایک جرگے یا قبائلی کونسل کی مداخلت کے بعد ہی یہ سلسلہ رکا تھا۔

بتایا گیا ہے کہ حکام تازہ واقعے کے بعد بھی جنگ بندی کے لیے کوششوں میں مصروف ہیں۔

نمائندہ ڈیلی اردو کے مطابق سیکورٹی فورسز نے کارروائی کرتے ہوئے 30 سے زائد افراد کو حراست میں لے کر تفتیش شروع کردی ہے۔

دوسری جانب لوئر کرم کے علاقے بالش خیل میں نامعلوم دہشت گردوں نے بجلی کی مین سپلائی لائن پر فائرنگ کی جس سے تاریں ٹوٹ گئیں جس سے پاراچنار سمیت دیگر علاقوں کی بجلی منقطع ہوگئی ہے۔

پاکستان میں قبائلی اور خاندانی جھگڑے عام ہیں۔ تاہم یہ خیبر پختونخوا کے دور درازعلاقوں میں خاص طور پر طویل اور پرتشدد ہو سکتے ہیں، جہاں کمیونٹیز روایتی قبائلی اعزاز کے ضابطوں کی پابندی کرتی ہیں۔ سنی اکثریتی مسلم ملک پاکستان میں شیعہ اقلیت طویل عرصے سے اپنے ساتھ امتیازی سلوک اور اپنے تشدد کا شکار ہونے کے خلاف شکایت کرتی آئی ہے۔