کرم میں گھر پر مارٹر گولہ گرنے سے ایک ہی خاندان کے پانچ بچے ہلاک

صدہ (نمائندہ ڈیلی اردو) پاکستان کے شورش زدہ صوبے خیبر پختونخوا کے قبائلی ضلع کرم کے علاقے مناتو کے گاؤں وراستہ میلہ میں گزشتہ شب نامعلوم سمت سے داغا گیا مارٹر گولہ گلاب ماما نامی شخص کے گھر پر گرا جس کے نتیجے میں ایک ہی خاندان کے پانچ بچے موقع پر ہلاک ہو گئے۔ 

ڈیلی اردو کے مطابق ہلاک ہونے والے بچوں میں 17 سالہ محمد صابر، 15 سالہ محمد اسامہ، 14 سالہ محمد قابل، 8 سالہ محمد ساجد اور 6 سالہ محمد صادق شامل ہیں۔

مارٹر گولہ لگنے سے گھر مکمل طور پر تباہ ہو گیا اور دھماکے کی آواز دور دور تک سنی گئی۔ صبح سویرے مقامی افراد بچوں کی لاشیں اٹھا کر مناتو مین روڈ پر ایف سی قلعے کے سامنے رکھ کر شدید احتجاج میں شریک ہوئے اور کہا کہ مسلسل گولہ باری سے بے گناہ شہری نشانہ بن رہے ہیں مگر کوئی ذمہ دار سامنے نہیں آتا۔ 

مظاہرین نے الزام لگایا کہ اس سے قبل بھی گھروں اور مساجد پر نامعلوم سمت سے مارٹر گولے فائر کیے گئے مگر آج تک کسی کو جوابدہ نہیں ٹھہرایا گیا۔ 

مقامی مشران اور سیکیورٹی حکام کی یقین دہانی کے بعد دھرنا ختم کر دیا گیا۔ پولیس کے مطابق شفاف تحقیقات کی جائیں گی اور ملوث عناصر کو سخت سزا دلائی جائے گی جبکہ حکام نے متاثرہ خاندان کو معاوضہ اور تباہ شدہ گھر کی دوبارہ تعمیر کا وعدہ بھی کیا ہے۔