کرک اور خیبر میں سی ٹی ڈی کے آپریشنز، 9 دہشت گرد ہلاک، 21 گرفتار

پشاور (ڈیلی اردو) پاکستان کے شورش زدہ صوبے خیبر پختونخوا کے اضلاع کرک اور خیبر میں کاؤنٹر ٹیررازم ڈیپارٹمنٹ (سی ٹی ڈی) نے دو مختلف کارروائیاں کی ہیں، جن میں 9 دہشت گرد ہلاک جبکہ 21 کو گرفتار کر لیا گیا ہے۔

سینٹرل پولیس آفس کے مطابق کاؤنٹر ٹیررازم ڈیپارٹمنٹ (سی ٹی ڈی) کے انٹیلی جنس بیسڈ آپریشنز  کے دوران 9 دہشت گرد مارے گئے۔

سینٹرل پولیس آفس کے مطابق مدرسہ حقانیہ دھماکا اور مولانا فضل الرحمان پرخودکش حملے کی منصوبہ بندی کے کیسز میں پیش رفت ہوئی  ہے جہاں کرک اور خیبر میں کارروائیوں کے دوران 9  دہشت گرد ہلاک ہوگئے اور 21 کو گرفتار کر لیا گیا جن میں افغان باشندے بھی شامل ہیں۔

سی پی او کا کہنا ہے کہ تحقیقات کے دوران دہشتگردی کے فنانسنگ نیٹ ورک،  مالی ذرائع، ٹھکانے اور ٹارگٹ سلیکشن پیٹرن بےنقاب ہوئے جب کہ کرپٹو کرنسی کے ذریعے دہشت گردوں کی فنڈنگ کے شواہد ملے ہیں۔

سینٹرل پولیس آفس کے مطابق کالعدم تنظیموں کے سلیپر سیلز اور  غیرملکی جنگجوؤں کے نیٹ ورکس کا سراغ لگایا گیا ہے، دہشتگردی کے واقعات میں کالعدم تحریک طالبان پاکستان کے منظم نیٹ ورک کی نشاندہی ہوئی، گرفتار دہشت گرد واقعات کی تفتیش میں سرحد پار روابط اور دشوار جغرافیہ بڑے چیلنجز ہیں۔

سی پی او کا کہنا ہے کہ متعدد بڑے حملوں  مثلاًپولیس لائنز خودکش حملہ اور حقانیہ مدرسہ دھماکےکی ذمے داری کسی نےقبول نہیں کی، بعض کیسز میں کالعدم تنظیموں کے دعوے غلط اور گمراہ کن ثابت ہوئے۔