کرک میں پولیس آپریشن، کالعدم ٹی ٹی پی کے 8 دہشت گرد ہلاک

کرک (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع کرک میں پولیس نے خفیہ اطلاعات کی بنیاد پر کارروائی کرتے ہوئے 8 دہشت گردوں کو ہلاک کر دیا ہے۔

ریجنل پولیس آفیسر (آر پی او) کوہاٹ عباس مجید مروت کے مطابق یہ کارروائی کوہاٹ اور کرک کے سرحدی پہاڑی سلسلے میں تھانہ خرم کی حدود، کرکنڈوں کے علاقے میں کی گئی، جہاں دہشت گردوں کی موجودگی کی اطلاع موصول ہوئی تھی۔ 

آپریشن کے دوران پولیس اور دہشت گردوں کے درمیان شدید فائرنگ کا تبادلہ ہوا، جس کے نتیجے میں 8 دہشت گرد ہلاک جبکہ متعدد کے زخمی ہونے کی اطلاعات ہیں۔

آر پی او کوہاٹ نے بتایا کہ کارروائی کے دوران دہشت گردوں کے کئی پہاڑی ٹھکانے مکمل طور پر تباہ کر دیے گئے ہیں۔ آپریشن میں بھاری پولیس نفری کے ساتھ خفیہ اداروں کے اہلکار بھی شریک ہیں جبکہ ڈسٹرکٹ پولیس آفیسر (ڈی پی او) کرک خود موقع پر موجود ہیں اور کارروائی کی نگرانی کر رہے ہیں۔

عباس مجید مروت کے مطابق علاقے کو مکمل طور پر گھیرے میں لے لیا گیا ہے تاکہ کسی بھی دہشت گرد کو فرار ہونے کا موقع نہ مل سکے۔ انہوں نے بتایا کہ آپریشن کے دوران ایک پولیس اہلکار معمولی زخمی ہوا ہے۔

آر پی او کوہاٹ کا کہنا ہے کہ پولیس اور قانون نافذ کرنے والے ادارے علاقے میں امن و امان کے قیام کے لیے پرعزم ہیں اور دہشت گردی کے مکمل خاتمے تک کارروائیاں جاری رہیں گی۔ انہوں نے عوام سے اپیل کی کہ وہ سیکیورٹی فورسز کے ساتھ تعاون کریں اور افواہوں پر کان نہ دھریں، جبکہ صورتحال پر مسلسل نظر رکھی جا رہی ہے۔

پولیس حکام کے مطابق ہلاک ہونے والے دہشت گردوں کا تعلق کالعدم تحریک طالبان پاکستان (ٹی ٹی پی) سے بتایا جاتا ہے۔