ہنگو میں پولیس قافلے پر دھماکا، ایس ایچ او سمیت تین اہلکار زخمی

ہنگو (ڈیلی اردو) پاکستان کے شورش زدہ صوبے خیبرپختونخوا کے ضلع ہنگو کے علاقے دوآبہ میں پولیس قافلے کو آئی ای ڈی حملے کا نشانہ بنایا گیا، جس کے نتیجے میں ایس ایچ او تھانہ دوآبہ عمران الدین سمیت تین اہلکار زخمی ہو گئے۔

پولیس کے مطابق حملہ اُس وقت پیش آیا جب پولیس افسران سرچ آپریشن سے واپس آ رہے تھے۔ زخمیوں کو ڈی ایچ کیو ہسپتال ہنگو منتقل کر دیا گیا ہے، جہاں اُن کی حالت خطرے سے باہر بتائی جاتی ہے۔

وزیر اعلیٰ خیبرپختونخوا محمد سہیل آفریدی نے واقعے کا نوٹس لیتے ہوئے آئی جی پولیس سے رپورٹ طلب کر لی ہے اور زخمی اہلکاروں کو فوری طبی امداد فراہم کرنے کی ہدایت کی ہے۔

دھماکے کے بعد علاقے کو گھیرے میں لے کر سرچ آپریشن شروع کر دیا گیا جبکہ ضلع بھر میں سیکیورٹی ہائی الرٹ کر دی گئی ہے۔

چند روز قبل ہنگو میں ایک بم حملے میں ایس پی آپریشنز اسد زبیر سمیت تین پولیس اہلکار ہلاک ہو گئے تھے۔