یمن میں بارودی سرنگوں اور کلسٹر بم دھماکوں میں 11 افراد ہلاک، 38 زخمی

صنعاء (ڈیلی اردو) یمن میں 11 افراد بارودی سرنگوں اور کلسٹر بموں کے دھماکوں میں مارے گئے ہیں۔

المسیرہ کی رپورٹ کے مطابق یمن میں بارودی سرنگوں کو صاف کرنے والے مرکز کی رپورٹ کے مطابق نومبر کے مہینے میں سعودی اتحاد کی جانب سے بچھائی جانے والی بارودی سرنگوں اور کلسٹر بموں کے پھٹ جانے سے 11 ہلاک اور 38 زخمی ہوئے۔

رواں سال کے شروع سے اب تک بارودی سرنگوں اور کلسٹر بموں کے دھماکوں سے 230 یمنی شہری ہلاک اور 462 زخمی ہوئے ہیں۔

دوسری جانب بارودی سرنگوں کو ناکارہ بنانے والے یمنی مرکز نے اپنی تازہ ترین رپورٹ میں کہا ہے کہ اب تک 200 سے زائد بچے سعودی عرب اور اس کے اتحادیوں کی بچھائی ہوئی بارودی سرنگوں کی زد میں آکر اپنی جان سے ہاتھ دھو چکے ہیں۔

اس وقت یمن میں لاکھوں بچے غذا، تعلیم اور صحت کے اپنے ابتدائی ترین حقوق سے محروم ہیں اور ان کے رنج و غم میں سعودی اتحاد کی بچھائی ہوئی بارودی سرنگوں اور ان کے سروں پر گرنے والے بمبوں نے اور زیادہ شدت پیدا کر دی ہے۔

رپورٹ میں مزید آیا ہے کہ اقوام متحدہ گزشتہ آٹھ برسوں کے دوران یمن کے خلاف جنگ اور محاصرے کا خاتمہ کروانے میں ناکام رہا اور نتیجہ یہ ہوا ہے کہ رواں سال کے دوران کم از کم 145 بچے سعودی اتحاد کی بارودی سرنگوں اور بمبوں کی زد پر آکر موت کی نیند سو گئے۔