یوکرین اور روس کلسٹر بموں کا استعمال بند کریں، ہیومن رائٹس واچ

نیو یارک (ڈیلی اردو/رائٹرز/اے پی/ڈی پی اے) ہیومن رائٹس واچ نے ایک رپورٹ میں بتایا ہے کہ روسی اور یوکرینی دونوں افواج کلسٹر بموں کا استعمال کر رہے ہیں، جس سے یوکرینی شہری ہلاک ہورہے ہیں۔ اس دوران امریکہ کلسٹر بم فراہم کرنے کے یوکرین کے مطالبے پر غور کر رہا ہے۔

If you want a free, safe, and secure #Ukraine tomorrow, don’t use #cluster munitions today.

???? Listen to @astrehlein’s Daily Brief: https://t.co/ByNiWqa9jl pic.twitter.com/vSSpi4rQxO

— Human Rights Watch (@hrw) July 6, 2023

انسانی حقوق کی بین الاقوامی تنظیم ہیومن رائٹس واچ نے جمعرات کو جاری اپنی ایک رپورٹ میں کہا ہے کہ روس اور یوکرین کلسٹر بموں کا استعمال کر رہے ہیں جس کا نشانہ یوکرینی شہری بن رہے ہیں۔

If you want a free, safe, and secure #Ukraine tomorrow, don’t use #cluster munitions today.

???? Listen to @astrehlein’s Daily Brief: https://t.co/ByNiWqa9jl pic.twitter.com/vSSpi4rQxO

— Human Rights Watch (@hrw) July 6, 2023

تنظیم نے دونوں ملکوں سے ان ہتھیاروں کا استعمال روک دینے کی اپیل کی۔ اس نے امریکہ سے بھی اپیل کی کہ یہ ہتھیار یوکرین کو فراہم نہ کرے۔

کلسٹر بموں کے استعمال پر پابندی

دنیا کے 120 سے زائد ملکوں نے کلسٹر بموں پر پابندی عائد کرنے کے ایک معاہدے پر دستخط کیے ہیں۔ ایک دوسرے کے دشمن ممالک عام طورپر ان مبینہ چھوٹے چھوٹے بموں کو بڑے علاقوں میں بکھیر دیتے ہیں جو بعد میں بھی مہینوں یا سالوں تک غیر محتاط شہریوں کو ہلاک یا اپاہج کرسکتے ہیں۔

روس، امریکہ اور یوکرین نے اس معاہدے پر دستخط کرنے سے انکار کر دیا ہے۔

پینٹاگون کے ایک اعلیٰ افسر نے گزشتہ ماہ کے اواخر میں کہا تھا کہ کلسٹر بم روسی افواج کو پیچھے دھکیلنے میں یوکرین کے لیے کارآمد ثابت ہوں گے۔ تاہم کانگریس کی پابندیوں اور اتحادیوں کے خدشات کے مدنظر بائیڈن انتظامیہ نے انہیں ابھی تک کییف کے لیے منظور نہیں کیا تھا۔ لیکن بتایا جاتا ہے کہ اب امریکی حکومت یوکرین کو ان ہتھیاروں کی فراہمی پر غور کررہی ہے۔

کلسٹر بموں سے سینکڑوں یوکرینی شہری ہلاک

ہیومن رائٹس واچ نے سو سے زائد رہائشیوں، عینی شاہدین اور مقامی ایمرجنسی اہلکاروں کے انٹرویوز کا حوالہ دیتے ہوئے کہا کہ یوکرین نے گزشتہ سال روس کے فوجی حملے کے بعد مشرقی یوکرین کے شہر ایزیم اور اس کے اطراف میں روسی کنٹرول والے علاقوں میں کلسٹر بم برسائے تھے۔

ہیومن رائٹس واچ کا کہنا ہے کہ یوکرین کے ان حملوں میں کم از کم آٹھ شہری ہلاک اور کم ا زکم 15 شہری زخمی ہوئے۔

اس بین الاقوامی تنظیم نے اس سے قبل بتایا تھا کہ یوکرین میں روس کی طرف سے کلسٹر بموں کے استعمال سے سینکڑوں شہری ہلاک ہوئے ہیں۔ اقوام متحدہ کی انسانی حقوق کونسل نے بھی دونوں طرف سے کلسٹر بموں کے استعمال کی تصدیق کی ہے۔

ہیومن رائٹس واچ کی قائم مقام ڈائریکٹر میری وارہم نے ایک بیان میں کہا، “روس اور یوکرین کی طرف سے استعمال ہونے والے کلسٹر بم اب عام شہریوں کو ہلاک کررہے ہیں اور کئی برسوں تک ان سے ہلاکتوں کا سلسلہ جاری رہے گا۔”

انہوں نے مزید کہا، “دونوں فریقوں کو اس کا استعمال بند کردینا چاہئے اورمزید ہتھیاروں کے حصول کی اندھا دھند کوشش ترک کردینی چاہئے۔”

دریں اثنا یوکرین کی حکومت نے امریکی کانگریس کے اراکین سے اپیل کی ہے کہ وہ جو بائیڈن انتظامیہ پر کلسٹر بم بھیجنے کی منظوری کے لیے دباو ڈالیں۔