‏اسلام آباد میں بھارتی ہائی کمیشن کے دو اہلکار گرفتار

اسلام آباد (ڈیلی اردو) اسلام آباد پولیس نے بھارتی ہائی کمیشن کے دو اہلکاروں کو گرفتار کرلیا۔

ذرائع کے مطابق بھارتی ہائی کمیشن کے دو اہلکار صبح کے وقت تیز رفتاری سے گاڑی چلا رہے تھے کہ اس دوران گاڑی بے قابو ہو گئی اور اس کی زد میں آ کر ایک شخص زخمی ہو گیا۔

ذرائع کا کہنا ہے کہ بھارتی اہلکاروں نے حادثے کے بعد فرار ہونے کی کوشش کی تاہم موقع پر موجود شہریوں نے بھارتی ہائی کمیشن کے اہلکاروں کو پکڑ لیا۔

ذرائع کا بتانا ہے کہ پولیس نے موقع پر پہنچ کر بھارتی ہائی کمیشن کے دونوں اہلکاروں کو حراست میں لے لیا۔

بھارت میں پاکستانی ناظم الامور کی طلبی
پاکستان میں بھارتی ہائی کمیشن کے اہلکاروں کی گرفتاری پر بھارت میں پاکستان کے ناظم الامور سید حیدر شاہ کو بھارت کی طرف سے احتجاجی مراسلہ دیا گیا ہے۔

پاکستانی ناظم الامور کو بھارتی دفتر خارجہ طلب کر کے احتجاجی مراسلہ دیا گیا، احتجاجی مراسلے میں پاکستان سے بھارتی ہائی کمیشن کے اہلکاروں کی فوری رہائی کا مطالبہ کیا گیا ہے۔