آبنائے ہرمز میں تین بحری جہازوں پر پروجیکٹائل حملے

لندن (ڈیلی اردو) رائل تھائی نیوی کی جانب سے تھائی لینڈ میں رجسٹر کارگو جہاز میوری ناری پر حملے کی تصدیق کے بعد بی بی سی ویریفائی نے میری ٹائم سکیورٹی فرم وینگارڈ سے ان تینوں جہازوں کے بارے میں تفصیلات حاصل کی ہیں جن کو آج نامعلوم پروجیکٹائل سے نشانہ بنایا گیا ہے۔

ون میجسٹی نامی کنٹینر جہاز جاپان میں رجسٹرڈ ہے اور اس پر اس وقت حملہ ہوا جب وہ متحدہ عرب امارات کے ساحلی شہر راس الخیمہ سے 29 میل (47 کلومیٹر) شمال میں تھا۔ اس حملے نتیجے میں جہاز 10 سینٹی میٹر (4 انچ) سوراخ ہو گیا۔ تاہم اب جہاز محفوظ بندرگاہ کی طرف بڑھ رہا ہے۔

سٹار گیوینتھ نامی دوسرا جہاز مارشل آئی لینڈ میں رجسٹرڈ ہے۔ اطلاعات کے مطابق کہ دبئی کے شمال میں تقریباً 57 میل (92 کلومیٹر) کے فاصلے پر کسی نامعلوم ذریعہ کی جانب سے حملے کے نتیجے میں جہاز کو نقصان پہنچا لیکن اس کا عملہ محفوظ ہے۔

وینگارڈ نے اس بات کی بھی تصدیق کی کہ میوری ناری عمان کے شمال میں تقریباً 12 میل (19 کلومیٹر) کے فاصلے پر تھا جب اس پر حملہ کیا گیا، جس سے جہاز میں آگ لگ گئی۔

نیچے دیے گئے نقشے میں ان مقامات کی نشاندہی کی گئی جہاں یہ واقعات پیش آئے۔ بی بی سی نے وینگارڈ اور برطانیہ کی میری ٹائم ٹریڈ آپریشنز کے سکیورٹی اتھارٹی کی جانب سے مہیا تفصیلات کا موازنہ کر کے اسے تیار کیا ہے۔

برطانیہ کے میری ٹائم مانیٹر ٹریڈ آپریشنز (یو کے ایم ٹی او) کا کہنا ہے کہ انھیں موصول ہونے والی اطلاعات کے مطابق مشرق وسطیٰ میں تنازع کے آغاز سے لے کر اب تک 13 جہازوں پر حملہ ہو چکا ہے۔

یو کے ایم ٹی او کا کہنا ہے کہ انھیں مشکوک سرگرمیوں کی چار رپورٹیں بھی موصول ہوئی ہیں، جس سے خلیج عرب، آبنائے ہرمز اور خلیج عمان میں اور اس کے ارد گرد کام کرنے والے بحری جہازوں کو متاثر کرنے والے واقعات کی کل تعداد 17 ہو گئی ہے۔

اس سے قبل برطانیہ کے میری ٹائم ٹریڈ آپریشنز نے خبر دی تھی کہ تین تجارتی جہازوں سے ’نامعلوم پروجیکٹائل‘ ٹکرانے کی اطلاعات ہیں۔ 

ان میں سے ایک کارگو جہاز، جو کہ عمان کے شمال میں موجود تھا، کو پرجیکٹائل لگنے کے بعد اس کے عملے کو بحفاظت طریقے سے نکال لیا گیا تھا۔