آبنائے ہرمز کے قریب دھماکوں کی آوازیں، جزیرہ قشم کے آسمان پر روشنیاں دیکھے جانے کی اطلاعات

تہران (ڈیلی اردو) ایران کی سرکاری خبر رساں ایجنسی ارنا نے اطلاع دی ہے کہ آبنائے ہرمز کے قریب واقع جزیرہ قشم کے سمندری علاقے میں متعدد دھماکوں کی آوازیں سنی گئیں، جبکہ بعض رہائشیوں نے آسمان پر روشنیاں دیکھنے کا دعویٰ کیا ہے۔

ارنا کے قشم میں موجود نمائندے کے مطابق دھماکوں کی آوازیں سمندر کی جانب سے سنائی دیں۔ دوسری جانب بعض ذرائع نے جزیرے میں فضائی دفاعی نظاموں کی سرگرمی کی اطلاعات بھی دی ہیں۔ غیر مصدقہ رپورٹس میں امکان ظاہر کیا گیا ہے کہ یہ آوازیں آبنائے ہرمز میں مبینہ خلاف ورزی کرنے والے بحری جہازوں کو روکنے کے لیے کی گئی انتباہی فائرنگ کی ہو سکتی ہیں، تاہم اس دعوے کی تصدیق نہیں ہوئی۔

آبنائے ہرمز عالمی تجارت اور توانائی کی ترسیل کے لیے انتہائی اہم سمندری گزرگاہ ہے، جہاں سے دنیا کی تیل اور مائع قدرتی گیس کی بڑی مقدار گزرتی ہے۔ بین الاقوامی توانائی ایجنسی کے مطابق اس گزرگاہ میں کسی بھی قسم کی سکیورٹی کشیدگی عالمی توانائی کی ترسیل اور تیل کی قیمتوں کو متاثر کر سکتی ہے۔ تاہم قشم کے قریب ہونے والے دھماکوں کی نوعیت، ممکنہ نقصان یا کسی بحری جہاز کے ملوث ہونے سے متعلق فی الحال کوئی مصدقہ تفصیلات سامنے نہیں آئیں۔