اسپین نے اسرائیلی ہتھیاروں کی ترسیل پر مکمل پابندی عائد کر دی

میڈرڈ (ڈیلی اردو/ڈی پی اے)  اسپین کی حکومت نے منگل کو اسرائیل کے لیے ہتھیاروں کی ترسیل پر مکمل پابندی عائد کر دی ہے۔

وزیراعظم پیدرو سانچیز کے مطابق اس اقدام کا مقصد غزہ میں ’’نسل کشی‘‘ روکنا ہے۔ اس پابندی کے تحت اسرائیل کو دفاعی سازوسامان، دوہرے استعمال کی ٹیکنالوجی اور فوجی ایندھن کی برآمد یا درآمد پر مکمل پابندی ہوگی۔ اس کے علاوہ مقبوضہ فلسطینی علاقوں میں قائم اسرائیلی بستیوں سے آنے والی مصنوعات اور ان کی تشہیر بھی ممنوع قرار دی گئی ہے۔

معاشی امور کے وزیر کارلوس کوئیرپو نے کہا کہ یہ اقدام عالمی سطح پر اسرائیل پر ’’ہتھیاروں کی ترسیل پر مکمل پابندی‘‘ کی پہلی مثال ہے۔ اسپین پہلے ہی غزہ پر اسرائیلی حملوں کے آغاز سے دفاعی سازوسامان کی خرید و فروخت روک چکا تھا، مگر اب یہ پابندی قانون کا حصہ بن گئی ہے۔

یہ فیصلہ فوری طور پر نافذ ہو گا تاہم اس کی پارلیمان سے منظوری ابھی باقی ہے، جہاں سانچیز کی بائیں بازو کی حکومت کو اکثریت حاصل نہیں۔ سانچیز نے اس ماہ نو اقدامات کا اعلان کیا تھا تاکہ غزہ میں اسرائیلی کارروائیوں کو روکا جا سکے۔

انہوں نے نیویارک کی کولمبیا یونیورسٹی میں ایک خطاب کرتے ہوئے کہا: ’’ہم اپنی آنکھوں کے سامنے اکیسویں صدی کے سب سے سیاہ اور خوفناک واقعات میں سے ایک دیکھ رہے ہیں۔ بین الاقوامی برادری کے لیے خاموش اور مفلوج رہنا ممکن نہیں۔‘‘