قلات میں کارروائی کے دوران 4 دہشت گرد ہلاک، گوادر میں آئی ای ڈی دھماکے سے میجر بھی ہلاک

کوئٹہ(ڈیلی اردو) بلوچستان کے شورش زدہ اضلاع قلات اور گوادر میں سکیورٹی کارروائیوں کے دوران چار دہشت گرد ہلاک ہوگئے، جبکہ گوادر کے علاقے شادی کور میں کلیئرنس آپریشن کے دوران دیسی ساختہ دھماکہ خیز مواد کے دھماکے میں پاک فوج کے میجر وجاہت وحید بھی ہلاک ہوگئے۔ ان کی عمر 34 سال اور تعلق لاہور سے بتایا گیا ہے۔

پاک فوج کے شعبۂ تعلقات عامہ (آئی ایس پی آر) کے مطابق 18 اکتوبر 2026 کو قلات کے علاقے جٹک آباد میں خفیہ اطلاعات کی بنیاد پر کارروائی کی گئی۔ سکیورٹی فورسز نے دہشت گردوں کے ٹھکانے کو نشانہ بنایا، جس کے دوران فائرنگ کے تبادلے میں چار دہشت گرد ہلاک ہوگئے۔ کارروائی کے بعد جائے وقوع سے اسلحہ اور گولہ بارود بھی برآمد کیا گیا۔

آئی ایس پی آر کے مطابق گوادر کی تحصیل پسنی کے علاقے شادی کور میں دہشت گردوں کی موجودگی کے شبہے میں کلیئرنس آپریشن جاری تھا کہ سکیورٹی فورسز کے دستے کو دیسی ساختہ دھماکہ خیز مواد سے نشانہ بنایا گیا۔ دھماکے میں دستے کی قیادت کرنے والے میجر وجاہت وحید ہلاک ہوگئے۔

ترجمان کے مطابق سکیورٹی فورسز نے دونوں علاقوں میں دہشت گردوں کے خاتمے اور امن و امان کی صورت حال بہتر بنانے کے لیے کارروائیاں جاری رکھنے کا عزم ظاہر کیا ہے۔ آئی ایس پی آر کا کہنا ہے کہ دہشت گردی کے مکمل خاتمے کے لیے سکیورٹی فورسز اور قانون نافذ کرنے والے اداروں کی کارروائیاں جاری رہیں گی۔