افریقی ملک نائجر میں مسجد پر دہشت گردوں کا حملہ، 44 افراد ہلاک، 13 زخمی

نیامے (ڈیلی اردو) افریقی ملک نائجر کے دیہی قصبے کوکورو میں دہشت گردوں کے حملے میں 44 افراد ہلاک اور متعدد زخمی ہوگئے۔

غیر ملکی خبر رساں ایجنسی کے مطابق یہ حملہ جمعہ کے روز اس وقت ہوا جب لوگ مسجد میں نماز ادا کر رہے تھے۔ وزارت داخلہ کے مطابق دہشت گردوں نے مسجد کو گھیر کر نمازیوں پر فائرنگ کی، جبکہ مقامی بازار اور گھروں کو بھی آگ لگا دی۔

سرکاری حکام کے مطابق اس حملے میں 13 افراد زخمی ہوئے ہیں، جبکہ سیکیورٹی فورسز نے ملزمان کی تلاش کے لیے کارروائیاں شروع کر دی ہیں۔

نائجر کی حکومت نے واقعے کے بعد ملک میں 3 روزہ قومی سوگ کا اعلان کیا ہے اور دہشت گردوں کو گرفتار کر کے انصاف کے کٹہرے میں لانے کے عزم کا اظہار کیا ہے۔