افغانستان میں امن کا مطلب پاکستان میں امن ہے: آرمی چیف قمر باجوہ

راولپنڈی (ڈیلی اردو) آرمی چیف جنرل قمر جاوید باجوہ نے کہا ہے کہ افغانستان میں امن کا مطلب پاکستان میں امن ہے اور پاکستان بین الافغان مذاکرات کی حمایت جاری رکھے گا۔

پاکستان فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے پشاور کور ہیڈ کوارٹرز کا دورہ کیا جہاں انہیں سیکیورٹی صورتحال، سرحد پر لگائی گئی باڑھ سمیت بارڈر منیجمنٹ پر بریفنگ دی گئی۔

#COAS visited Corps HQ Peshawar today. COAS was given detailed update on security situation, border management including fencing, capacity enhancement of FC and police in newly merged tribal districts as a result of transition to stability. Appreciating officers and men of (1/3) pic.twitter.com/a7OOdGqBzV

— DG ISPR (@OfficialDGISPR) January 15, 2021

آئی ایس پی آر نے بتایا کہ آرمی چیف کو نئے اضلاع میں ایف سی اور پولیس کی استعداد کار بڑھانے پربھی بریفنگ دی گئی۔

آرمی چیف نے پشاور کور کے افسران اور جوانوں کی تعریف کی اور قبائلی اضلاع میں استحکام لانے پر قانون نافذ کرنے والے اداروں بشمول ایف سی اور پولیس کی کاوشوں کو سراہا۔

آرمی چیف نے دہشتگردی کے خلاف جنگ میں مقامی آبادی کی قربانیوں اور مسلح افواج کے ساتھ تعاون کی بھی تعریف کی۔

اس موقع پر آرمی چیف کا کہنا تھا کہ امن و استحکام کی کوششوں کے ذریعے مستقبل میں فائدہ اٹھانا چاہیے، پاکستان بین الافغان مذاکرات کی حمایت جاری رکھے گا، افغانستان میں امن کا مطلب پاکستان میں امن ہے۔