افغانستان میں نئی فضائی کارروائیوں سے ’ہچکچائیں گے نہیں‘، خواجہ آصف

اسلام آباد (ڈیلی اردو)پاکستان کے وزیر دفاع خواجہ آصف نے کہا ہے کہ پاکستان افغانستان میں نئی فضائی کارروائیاں کرنے سے ’ہچکچائے گا نہیں‘۔

خبر رساں ادارے فرانس 24 کو دیے گئے انٹرویو میں انہوں نے دعویٰ کیا کہ پاکستان میں ہونے والے حملے کابل میں قائم طالبان حکومت اور انڈیا کی مبینہ ملی بھگت سے چھیڑی جانے والی ’پراکسی جنگ‘ کا نتیجہ ہیں۔

وزیر دفاع کا کہنا تھا کہ جب تک کابل کی جانب سے ’امن کی ضمانت‘ نہیں دی جاتی، پاکستان افغانستان میں نئی فضائی کارروائیوں سے گریز نہیں کرے گا۔

واضح رہے کہ اسلام آباد طویل عرصے سے یہ الزام عائد کرتا آیا ہے کہ کالعدم تحریک طالبان پاکستان (ٹی ٹی پی) کو افغانستان میں موجود طالبان حکومت کی حمایت حاصل ہے۔ افغان طالبان ان الزامات کی تردید کرتے رہے ہیں۔

گزشتہ برس ٹی ٹی پی کی کارروائیوں کے بعد پاکستان اور افغان طالبان کے درمیان سرحدی جھڑپیں بھی ہوئیں، جس کے بعد قطر اور ترکی کی سفارتی کوششوں سے کشیدگی میں کمی آئی تھی۔

خواجہ آصف نے مزید الزام عائد کیا کہ جب پاکستان پر حملوں کی بات آتی ہے تو نئی دہلی اور کابل ’ایک ہی صفحے پر‘ ہوتے ہیں، اور ان کے بقول انڈیا کے ساتھ جنگ کا ’امکان‘ اب بھی موجود ہے۔