امریکہ ہر روز بھارت اور پاکستان کی سرگرمیوں پر نظر رکھتا ہے، وزیر خارجہ مارکو روبیو

واشنگٹن (ڈیلی اردو) امریکی وزیر خارجہ مارکو روبیو نے کہا ہے کہ بھارت اور پاکستان کے درمیان حالیہ جھڑپوں کے بعد ہونے والی جنگ بندی کی نگرانی امریکہ ہر روز کرتا ہے۔ این بی سی نیوز کے پروگرام 'میٹ دی پریس' میں روبیو نے کہا کہ جنگ بندی اس وقت ممکن ہے جب دونوں فریق فائرنگ بند کرنے پر راضی ہوں، اور یہ عمل برقرار رکھنا ایک مشکل مرحلہ ہے۔

انہوں نے مزید کہا: “ہم ہر روز یہ دیکھتے ہیں کہ پاکستان اور بھارت کے درمیان کیا ہو رہا ہے، اسی طرح کمبوڈیا اور تھائی لینڈ میں بھی صورتحال کی نگرانی کی جاتی ہے۔”

روبیو نے یوکرین اور روس کے حوالے سے کہا کہ جنگ بندی بہت تیزی سے ٹوٹ سکتی ہے، لیکن امریکہ کی کوشش ہمیشہ یہ ہوگی کہ دنیا میں پائیدار امن قائم ہو۔

فاکس نیوز کو دیے گئے ایک انٹرویو میں روبیو نے کہا: “ہم خوش قسمت ہیں کہ ہمارے صدر نے امن کی بحالی کو ترجیح دی ہے۔ ہم نے یہ کمبوڈیا، تھائی لینڈ، بھارت اور پاکستان، روانڈا اور ڈی آر سی میں دیکھا ہے۔ ہم ہر موقع سے فائدہ اٹھاتے رہیں گے۔”

ادھر امریکی صدر ڈونلڈ ٹرمپ نے 10 مئی کو اعلان کیا تھا کہ بھارت اور پاکستان نے واشنگٹن کی ثالثی میں ہونے والی 'طویل رات' کی بات چیت کے بعد 'مکمل اور فوری' جنگ بندی پر اتفاق کیا ہے۔ تاہم انڈین وزیر اعظم نریندر مودی نے بھارت کی پارلیمنٹ میں واضح کیا کہ ’آپریشن سندور‘ کو روکنے میں کسی بھی ملک کی ثالثی شامل نہیں تھی۔