امریکی نژاد کویتی صحافی احمد شہاب الدین کو بری کر دیا گیا

واشنگٹن (ڈیلی اردو) کویت کی ایک عدالت نے امریکی کویتی صحافی احمد شہاب الدین کو تقریباً دو ماہ کی حراست کے بعد تمام الزامات سے بری کر دیا ہے۔ یہ بات صحافیوں کے تحفظ کی بین الاقوامی تنظیم کمیٹی ٹو پروٹیکٹ جرنلسٹس نے بتائی۔

41 سالہ صحافی کو ایران جنگ سے متعلق سوشل میڈیا پوسٹس کے خلاف کریک ڈاؤن کے دوران گرفتار کیا گیا تھا۔ ان پر جھوٹی معلومات پھیلانے، قومی سلامتی کو نقصان پہنچانے اور موبائل فون کے غلط استعمال کے الزامات عائد کیے گئے تھے۔

امریکی حکام کے مطابق رہائی کے بعد احمد شہاب الدین کویت چھوڑ چکے ہیں۔ وہ اس سے قبل نیویارک ٹائمز، بی بی سی اور الجزیرہ انگلش سمیت کئی عالمی اداروں کے ساتھ بطور کنٹریبیوٹر کام کر چکے ہیں۔

رپورٹ کے مطابق احمد شہاب الدین کو 28 فروری کو اس وقت گرفتار کیا گیا تھا جب وہ اپنے اہل خانہ سے ملاقات کے لیے کویت پہنچے تھے اور سوشل میڈیا پر ایران جنگ سے متعلق پوسٹس کر رہے تھے۔ ان کی ایک ویڈیو، جس میں کویت میں امریکی ایئر بیس کے قریب جنگی طیارے کے گرنے کا منظر دکھایا گیا تھا، بھی گردش میں رہی۔

15 مارچ کو کویت نے نیا قانون بھی نافذ کیا تھا، جس کے تحت فوجی اداروں سے متعلق جھوٹی افواہیں پھیلانے پر 10 سال تک قید کی سزا ہو سکتی ہے۔ 

رپورٹ کے مطابق اس کریک ڈاؤن کے دوران خلیجی ممالک میں سوشل میڈیا سرگرمیوں پر متعدد افراد کو گرفتار بھی کیا گیا۔