اوکاڑہ: دریائے ستلج میں کشتی الٹنے سے 8 افراد جاں بحق، متعدد لاپتہ، ریسکیو آپریشن جاری

اوکاڑہ (نمائندہ ڈیلی اردو) پنجاب کے ضلع اوکاڑہ میں ملو شیخاں کے قریب دریائے ستلج میں مسافروں کی کشتی الٹنے سے 8 افراد جاں بحق ہو گئے ہیں۔

تفصیلات کے مطابق دریائے ستلج میں ملو شیخاں کے قریب منچن آباد سے جنازے میں شرکت کیلئے آنے والے افراد کی کشتی الٹ گئی جس میں 25 لوگ سوار تھے۔ کشتی سوار بیشتر افراد ایک ہی خاندان سے تعلق رکھتے ہیں۔

واقعہ کی اطلاع ملتے ہی ریسکیو 1122 نے جائے حادثہ پر پہنچ کر آپریشن شروع کیا۔ ریسکیو ذرائع کا کہنا ہے کہ کشتی میں 25 میں سے 8 افراد کی نعشیں نکال لی گئی ہیں جبکہ 13 کو زندہ بچا لیا گیا ہے اور دیگر لاپتہ افراد کی تلاش کے لئے سرچ آپریشن جاری ہے۔

ضلعی انتظامیہ کے مطابق کشتی میں گنجائش سے زائد افراد سوار تھے۔

وزیراعلیٰ عثمان نے بزدار نے تمام وسائل بروئے کار لاتے ہوئے سرچ آپریشن تیز کرنے کی ہدایت کی ہے، جبکہ وزیراعلیٰ پنجاب کا کشتی حادثے میں قیمتی انسانی جانوں کے ضیاع پر دکھ اور افسوس کا اظہار کیا ہے۔