ایران سے رواں ہفتے مزید مذاکرات کی توقع، ٹرمپ کا فوجی کارروائی کا عندیہ

واشنگٹن(ڈیلی اردو) امریکی صدر ڈونلڈ ٹرمپ نے کہا ہے کہ امریکا اور ایران کے درمیان رواں ہفتے مزید مذاکرات متوقع ہیں، تاہم دونوں ممالک کے درمیان کسی ممکنہ معاہدے کی شرائط پر اب بھی نمایاں اختلافات موجود ہیں۔

ٹرمپ نے امریکی نشریاتی ادارے ایگزیوس کو دیے گئے ٹیلی فونک انٹرویو میں کہا کہ انہیں امید ہے کہ امریکی مذاکرات کار ایران کے ساتھ دوبارہ بات چیت کریں گے۔ ان کے مطابق ایران معاہدہ کرنا چاہتا ہے، لیکن تہران کی جانب سے پیش کی جانے والی شرائط وہ نہیں جنہیں واشنگٹن قبول کرنا چاہتا ہے۔

امریکی صدر نے ایران پر دوبارہ حملے کے امکان سے متعلق سوال کے جواب میں کہا کہ وہ اس امکان پر مسلسل غور کرتے رہتے ہیں۔ دوسری جانب ایرانی وزیر خارجہ عباس عراقچی نے کہا ہے کہ تہران اب بھی سفارتی حل کے لیے مذاکرات پر آمادہ ہے۔

مذاکرات میں قطر سمیت بعض علاقائی ممالک ثالثی کا کردار ادا کر رہے ہیں۔ حالیہ رابطوں میں ایران کی جانب سے آبنائے ہرمز کھولنے اور جوہری مذاکرات دوبارہ شروع کرنے کے لیے مختلف شرائط پیش کیے جانے کی اطلاعات ہیں، جبکہ امریکی انتظامیہ ایران سے جوہری پروگرام سے متعلق رعایتیں چاہتی ہے۔

ٹرمپ نے اس سے قبل ایران کی جانب سے آبنائے ہرمز دوبارہ کھولنے کی تجویز مسترد کرتے ہوئے کہا تھا کہ ایران کی پیشکش ان کی مطلوبہ شرائط کے مطابق نہیں۔ تاہم امریکی اور علاقائی ذرائع کے مطابق ثالثی کے ذریعے دونوں فریقوں کے درمیان بالواسطہ رابطے جاری ہیں اور آئندہ دنوں میں مزید ملاقاتیں متوقع ہیں۔

ایران کی جانب سے پیش کی گئی تجویز کے بارے میں بتایا گیا ہے کہ امریکا کی جانب سے بحری ناکہ بندی اٹھانے، تیل کی فروخت پر عائد پابندیاں ختم کرنے اور خطے میں جنگ بندی بحال کیے جانے کی صورت میں تہران ایک ہفتے کے اندر آبنائے ہرمز کھولنے اور جوہری مذاکرات دوبارہ شروع کرنے پر آمادگی ظاہر کر سکتا ہے۔

ٹرمپ نے جنگ کے خاتمے کی صورت میں تیل کی قیمتوں میں کمی کی بھی توقع ظاہر کی ہے۔ تاہم آبنائے ہرمز میں تجارتی آمدورفت اب بھی جنگ سے پہلے کی سطح سے کافی کم ہے، جبکہ خطے میں جاری کشیدگی عالمی توانائی منڈیوں پر اثر انداز ہو رہی ہے۔

ایرانی حکام کا کہنا ہے کہ تہران سفارتی راستے سے مسئلے کے حل کے لیے تیار ہے، تاہم ایران اور امریکا کے درمیان اہم معاملات پر اختلافات تاحال برقرار ہیں۔