ایران کے جوہری پروگرام کے خلاف کارروائیوں کا 90 فیصد ہدف حاصل کرلیا، صرف 10 فیصد باقی ہے: نیتن یاہو کا دعویٰ

تل ابیب (ڈیلی اردو) اسرائیلی وزیرِاعظم بنیامین نیتن یاہو نے دعویٰ کیا ہے کہ ایران کے جوہری پروگرام کو ختم کرنے کے لیے جاری کارروائیوں کا 90 فیصد ہدف حاصل کرلیا گیا ہے اور اب صرف 10 فیصد کام باقی ہے۔ انہوں نے اس بیان کو اسرائیل میں 27 اکتوبر کو ہونے والے پارلیمانی انتخابات سے قبل اپنی انتخابی مہم کا اہم حصہ بنایا ہے۔

برطانوی نشریاتی ادارے بی بی سی اور دیگر عالمی میڈیا رپورٹس کے مطابق نیتن یاہو نے اتوار کو اسرائیلی ٹی وی چینل 14 کو انٹرویو دیتے ہوئے اپنے سیاسی حریف اور سابق آرمی چیف گادی آئزن کوٹ کو تنقید کا نشانہ بنایا۔ انہوں نے کہا کہ ایران کے جوہری پروگرام کے خاتمے کا باقی کام صرف وہی مکمل کر سکتے ہیں اور ان کے مخالفین یہ ہدف حاصل کرنے کی صلاحیت نہیں رکھتے۔

نیتن یاہو نے سوشل میڈیا پلیٹ فارم ایکس پر مصنوعی ذہانت سے تیار کردہ ایسی تصویر بھی دوبارہ شیئر کی جس میں تل ابیب پر جوہری دھماکے جیسا منظر دکھایا گیا تھا۔ اس اقدام کو انتخابی مہم میں ایران سے لاحق خطرے کو نمایاں کرنے کی کوشش کے طور پر دیکھا جا رہا ہے۔

دوسری جانب اپوزیشن رہنما گادی آئزن کوٹ نے نیتن یاہو پر الزام عائد کیا ہے کہ وہ انتخابی حمایت حاصل کرنے کے لیے ایران کے خطرے کو سیاسی مقاصد کے لیے استعمال کر رہے ہیں۔ آئزن کوٹ کا کہنا ہے کہ نیتن یاہو ایران کے خلاف جنگ میں اپنے ہی طے کردہ اہداف حاصل کرنے میں ناکام رہے ہیں۔ تاہم آئزن کوٹ بھی ایران کے جوہری پروگرام کو ختم کرنے اور اسے جوہری ہتھیار بنانے سے روکنے کی حمایت کرتے ہیں، البتہ دونوں رہنماؤں کے درمیان اس مقصد کے حصول کی حکمتِ عملی پر اختلافات ہیں۔

عالمی میڈیا کے مطابق ایران کا جوہری پروگرام اور اس سے متعلق فوجی کارروائیاں اسرائیلی انتخابات کے اہم موضوعات میں شامل ہیں۔ نیتن یاہو کے حامی ان کی سکیورٹی پالیسی کو نمایاں کر رہے ہیں، جبکہ مخالفین جنگ کے نتائج اور حکومت کی کارکردگی پر سوال اٹھا رہے ہیں۔

دوسری جانب بین الاقوامی جوہری توانائی ایجنسی (آئی اے ای اے) نے ایران کی جوہری تنصیبات اور جوہری مواد کی نگرانی کے حوالے سے مشکلات کی نشاندہی کی ہے۔ ایجنسی کے مطابق امریکی اور اسرائیلی حملوں سے متاثرہ تنصیبات تک رسائی اور ایران کے افزودہ یورینیم کے ذخیرے کی تصدیق کے معاملات بدستور تشویش کا باعث ہیں