باجوڑ: عسکریت پسندوں کا پولیس اسٹیشن پر حملہ، ایڈیشنل ایس ایچ او ہلاک

باجوڑ (نمائندہ ڈیلی اردو) پاکستان کے شورش زدہ صوبے خیبر پختونخوا ضلع باجوڑ کی تحصیل ماموند کے علاقے عمرے تھانہ واڑہ ماموند پر پولیس اور عسکریت پسندوں کے درمیان شدید فائرنگ کا تبادلہ ہوا۔ اس جھڑپ میں ایڈیشنل ایس ایچ او گل نامو دین ہلاک جبکہ ایک اہلکار زخمی ہو گیا۔ زخمیوں کو فوری طور پر قریبی ہسپتال منتقل کیا گیا تھا جہاں گل نامودین دم توڑ گئے۔

پولیس کے مطابق، حملہ آور پاکستانی طالبان کے اہلکار تھے جنہوں نے تھانہ واڑہ ماموند کو نشانہ بنایا تاکہ مقامی سکیورٹی فورسز اور قانون نافذ کرنے والے اداروں کو نقصان پہنچایا جا سکے۔ تاہم پولیس کی بروقت اور مؤثر جوابی کارروائی کے باعث عسکریت پسند فرار ہونے پر مجبور ہو گئے۔

واقعے کے بعد پولیس نے علاقے کو گھیرے میں لے کر سرچ آپریشن شروع کر دیا ہے۔ حکام نے شہریوں سے اپیل کی ہے کہ مشتبہ افراد کی موجودگی کی صورت میں فوری اطلاع دیں اور غیر ضروری نقل و حرکت سے گریز کریں۔

پولیس کا کہنا ہے کہ ایس ایچ او اور دیگر اہلکار اپنی ذمہ داری کے ساتھ علاقے میں سکیورٹی برقرار رکھنے کے لیے سرگرم ہیں اور سرچ آپریشن جاری ہے تاکہ عسکریت پسندوں کی موجودگی کا مکمل خاتمہ کیا جا سکے۔