باجوڑ میں خودکش حملہ، ایف سی اہلکاروں سمیت 10 افراد ہلاک

خار (ڈیلی اردو) پاکستان کے شورش زدہ صوبے خیبر پختونخوا کے قبائلی ضلع باجوڑ کی تحصیل ماموند کے علاقے ملنگی میں فرنٹیئر کور کی ایک چوکی پر مبینہ خودکش حملے کے نتیجے میں ایف سی اہلکاروں سمیت کم از کم دس افراد ہلاک ہو گئے ہیں۔

اعلیٰ پولیس حکام نے نام ظاہر نہ کرنے کی شرط پر بتایا کہ ہلاک ہونے والوں میں ایک پولیس اہلکار اور ایک بچی بھی شامل ہیں، جبکہ ملبے تلے دبے مزید افراد کو نکالنے کے لیے امدادی کارروائیاں جاری ہیں۔

واقعہ کیسے پیش آیا؟

سینیئر پولیس افسر کے مطابق پیر کی شام نامعلوم افراد نے بارود سے بھری گاڑی اس عمارت سے ٹکرا دی جہاں فرنٹیئر کور کی چوکی قائم تھی۔ بتایا گیا ہے کہ اس عمارت میں پہلے ایک مدرسہ بھی قائم تھا۔ دھماکے سے عمارت کا بڑا حصہ منہدم ہو گیا۔

فوج کے شعبہ تعلقاتِ عامہ کی جانب سے تاحال اس واقعے سے متعلق کوئی باضابطہ بیان جاری نہیں کیا گیا۔

وزیرِ اعلیٰ خیبر پختونخوا سہیل آفریدی نے حملے کی مذمت کرتے ہوئے کہا کہ فورسز کے اہلکاروں سمیت ایک بچی کی ہلاکت انتہائی افسوسناک ہے۔ انہوں نے امدادی اداروں کو فوری اور مؤثر کارروائی کی ہدایت دیتے ہوئے کہا کہ ملبے تلے دبے افراد کو نکالنے کے لیے کارروائی تیز کر دی گئی ہے۔

انہوں نے کہا کہ صوبائی حکومت متاثرہ خاندانوں کے غم میں برابر کی شریک ہے اور دہشت گردی کے بزدلانہ واقعات سے قوم کے حوصلے پست نہیں کیے جا سکتے۔ ان کے مطابق دہشت گردی کے مکمل خاتمے کے لیے جامع حکمتِ عملی اختیار کی جائے گی۔

ملنگی، تحصیل ماموند میں واقع ہے جو ضلع باجوڑ کے شمال میں افغانستان کی سرحد سے متصل ہے۔ یہ علاقہ عنایت کلی بازار سے تقریباً بارہ سے پندرہ کلومیٹر کے فاصلے پر واقع ہے۔ پشاور سے باجوڑ جاتے ہوئے صدیق آباد اور پھر عنایت کلی آتا ہے، جس کے قریب ملنگی کا علاقہ موجود ہے۔

باجوڑ میں سکیورٹی صورتحال ایک عرصے سے کشیدہ ہے اور وقفے وقفے سے تشدد کے واقعات پیش آتے رہے ہیں۔ چند روز قبل واڑہ ماموند میں ایک حملے میں ایک پولیس انسپکٹر ہلاک ہوا تھا، جبکہ ماضی میں سیاسی اور مذہبی شخصیات کو بھی نشانہ بنایا جا چکا ہے۔

حکام کے مطابق واقعے کی تحقیقات جاری ہیں اور علاقے میں حفاظتی انتظامات مزید سخت کر دیے گئے ہیں۔